Giro eguzkitsuak argituta, kolorez beteta ageri ziren atzokoan ere, Hernani eta Astigarragako kaleak, herritarren mila mozorrorekin beteta. Festa giroa nagusitu zen egun osoan, txarangarekin, erraldoi eta buruhaundiekin, dantza festarekin...
Eta hernaniar eta astigartarrei, goizuetarrak batuko zaizkie gaur, lau eguneko festari hasiera emanez. Gaztetxoen Zahagi Dantzak piztuko du Inauterien sua arratsaldean, eta Leire eta Maria trikitilariek girotuko dute herria, mozorroen afarira bitartean. Beroketa lanak, astelehen eta astearteko egun haundietarako prestatzeko.
Astigarragan, berriz, gaur bukatuko dira Inauteriak, eta azkeneko egunean, Iñude eta Artzaien konpartsa izango da protagonista, eguerdi partean. Beraien dantza alaiarekin, herrian barrena ibiliko dira, garai bateko makina bat pertsonaiaren laguntzaz, eta danbor eta txistu doinuek girotuta.
Eta Hernanin, konpartsen eguna izango da gaurkoa. Eguerdiko 12:00etan aterako dira, Urbieta kaletik, herriko txokoak alaitzera. Eta arratsaldean, musikaren txanda, aukera hirukoitzarekin: txaranga, Hernani Musika Eskolako trikitilariak, eta Demode Quartet taldearen kontzertua Tilosetan.