Binakako Txapelketaren lehian bete-betean daude sartuta, Hernaniko eta Ereñotzuko bolariak; eta bihar dute hirugarren eta azkeneko kanporaketa, finalerako txartela lortzeko. Añorgan izango da tiraldia, goizeko 09:00etatik 11:00etara, eta arratsaldeko 16:30etatik 17:30etara.
Floridako eta Olaberriako tiraldiak jokatuta, ondo kokatuta daude, bailarako bi bikote. Izan ere, hirugarren postuan dago Miguel Arrozpide hernaniarra, Antonio Goenaga altzatarrarekin bikotea osatuta, 166 brilarekin; eta seigarren daude Leandro eta Ibon Miner osaba-iloba ereñotzuarrak, 150 brilarekin.
Biharko tiraldiaren arabera, pasea lortuko dute, gaur zortzi, datorren larunbatean, Altzan jokatuko den finalerako. B multzoan daude bailarako bikote guztiak, eta finalean, A multzoko onenekin batera ariko dira.
Datorren igandetik aurrera, Lehendakari Txapelketa
Binakakoa bukatu eta berehala ekingo diote bolariek, denboraldiko hurrengo txapelketari. Izan ere, datorren igandean bertan daukate aurreneko tiraldia, Lehendakari Txapelketaren barruan. Seguran izango da estreinakoa, eta beste bost jardunaldi izango ditu: Zarautzen, Legazpin, Urnietan eta Aian.