Egun seinalatua izango da gaurkoa, Urumea bailara osoan. Santa Ageda bezpera da, eta makilak hartuta, santa eskean aterako dira herritarrak, goiz zein arratsalde. Atzo San Blas egunez ondo zainduta, eztarriak sano dauzkatela erakutsiko dute denek, gaur urratu arte kantatzeko prest. Gogo faltarik ez dute izango, ereñotzuko gaztetxoek igandean falta ez zuten bezala.
Katiluzar guraso elkarteak antolatuta, haiek izan ziren santa eskean ateratzen aurrenekoak, igande goizean, eskolatik abiatuta. Eta auzo osoan barrena kantari, bidea egin zioten, gaur bailara osoan izango den hitzordu sorta zabalari.
Ereñotzun bertan, hain justu, Ur-Mia elkarteak jarri du gaurko hitzordua, eta arratsaldeko 16:30etan abiatuko dira.
Ekitaldi berezia Hernanin, lau abesbatza elkartuta
Hitzordu bakarraren faltan, hamaika zita izango dituzte Hernanin. Goizean eta eguerdian, eskola guztiek ospatuko dute Santa Ageda bezpera, kalera aterata zein ikastetxean bertan.
Eta arratsaldean, herriko abesbatzen txanda izango da. Bakoitzak jarri du bere hitzordua eta prestatu du bere ibilbidea, herrian barrena kantuan aritzeko. Baina aurten aurrenekoz, hitzordu berezi bat ere jarri dute: iluntzeko 19:00etan Plazan elkartuko dira Goiz Eguzki, Kantuz, Ohitura Zaharrak eta Hernani Musika Eskolako abesbatza, elkarrekin abesteko; eta herritar guztiei luzatu diete gonbitea, haiekin bat egiteko.
19:00etan Plazan, elkarrekin abestuko dute Goiz Eguzki, Kantuz, Ohitura Zaharrak eta Musika Eskolako abesbatzak.
Astigarragan, berriz, bi zita dauzkate arratsalderako. Aurrena, Norberto Almandoz musika eskolako haurrak aterako dira, 17:00etan; eta ondoren, musika eskolako helduak eta Aiztondo abesbatzakoak abiatuko dira kantari, 19:30etan.
Eta Goizuetan ere, arratsalderako jarri dute zita herritarrek, erronda egiteko. 18:30etan aterako dira.
SANTA AGEDA BEZPERA
HERNANIN
Urumea ikastolan, kalera aterako dira 10:45etan, eta eskola barruan egingo dute 16:15etan.
Elizatxo ikastolan, 11:00etan aterako dira kalera.
Inmakulada ikastetxean, 11:00etan aterako dira, Kaxkoan barrena ibiltzeko.
Langile ikastolan, LH5ekoek Laubidieta eraikinean abestuko dituzte koplak gelaz gela; eta LH6koak Meabe eta Bidebietako geletara joango dira.
Institutuan, 13:45etan kantatuko dute Santa Barbara eraikinean, eta Agustin Iturriaga eraikinera joango dira gero. Bukatzeko, inguruko etxeetan abestuko dute, 15:00ak aldera.
Abesbatzak, iluntzeko 19:00etan elkartuko dira Plazan, ekitaldi berezi bat egiteko: Goiz Eguzki, Kantuz, Hernani Musika Eskola eta Ohitura Zaharrak. Elkarrekin abestuko dute bertan, animatzen diren herritarrekin. Lehenago eta ondoren, herrian barrena ibiliko dira, bakoitza bere buelta eginez. Zaharren egoitzatik abiatuko da Goiz Eguzki abesbatza 17:45etan, eta ordu berean Milagrosatik Ohitura Zaharrak abesbatza.
ASTIGARRAGAN
Norberto Almandoz musika eskolan, 17:00etan aterako dira haurrak, kantu jira egitera, Foru Plazatik abiatuta.
Aiztondo abesbatza eta musika eskolako helduak, 19:30etan aterako dira Foru Plazatik, santa eskean.
EREÑOTZUN
Ur-Mia elkarteak, 16:30etan jarri du hitzordua, Santa Ageda bezpera ospatzeko.
GOIZUETAN
Herritarrak, 18:30etan aterako dira, kalez kale erronda egitera.