Ezin ikusgarriagoa izan zen, larunbatean, Mundarroko nesken taldeak etxean jokatu zuen partidua. Eta ezin bukaera hobea izan zuen, gainera: 53-52 nagusitu ziren astigartarrak, luzapenean, Easo kontrario zuzenaren aurrean.
Horrela, atzean utzi dute talde donostiarra, garaipen berberekin zegoena; eta bigarren jarri dira, Goierriren atzetik.
Moteletik hasi zuten partidua, puntu gutxirekin; eta 9-5 aurreratu bazen Mundarro aurreneko laurdenean, 16-16 berdinduta iritsi ziren atsedenera. Hortik aurrera, baina, nabarmen gehiago asmatu zuten bi taldeek. 32-30 aurretik bukatu zuten hirugarren laurdena, eta bi puntuko alde hori berdindu zuten donostiarrek, azkeneko laurdenean (44-44). Luzapenean erabakiko zen dena, eta partidu osoko parekotasuna izan zen protagonista berriro, baina azkeneko unean, astigartarrek asmatu zuten gehien, garaipen haundia eskuratzeko.
Mutilen talde nagusiek, galdu
Kanpoan jokatu zuten, aldiz, mutilen bi talde nagusiek; biek ere, Donostian: Bosteko Irauliren kantxan Mundarrok, eta Internacional taldearen kantxan Hernanik. Eta biek jaso zuten porrota, bi talde indartsuren kontra.
Oso partidu zaila zeukaten astigartarrek, liderraren aurrean; eta galduta ere (67-54), lana eman zioten. Primeran ekin zioten partiduari, eta 9-14 aurreratu ziren, aurreneko laurdenean. Baina hurrengo bietan, aurrea hartu eta tartea egin zuten donostiarrek: 32-26 atsedenean, eta 47-34 azkeneko laurdenaren faltan.
Berdintsu joan zen partidua hernaniarrentzat, Internacional seigarrenaren kontra. 6-10 hasi ziren irabazten, eta baita aurretik iritsi ere, atsedenaldira (17-22). Baina hortik aurrera, bere maila onena eman zuten donostiarrek, hirugarren laurdenean buelta emanda (40-31).