Udaberrian egingo den Doberako urteko batzarrean aldatuko da egungo zuzendaritza taldea. Izan ere, Jexux Eizagirre Portillo lehendakariak ez du postuan segiko, eta berarekin batera utziko dute kargua beste batzuek. Zuzendaritzako kide izateko proposamenak egin daitezke Doberan edo dobera@dobera.eus helbidean. Eizagirrek badauka ideia, nondik jo lezakeen haizeak.
Lau urte egin dituzu Doberako lehendakari. Nolatan animatu zinen pausoa ematera?
Ez nuen nire burua aurkeztu. Lehenago ere izana naiz zuzendaritzan, hain zuzen, Kronika sortu zeneko urte haietan. Alde horretatik baneukan esperientzia. Baina proposatu egin zidaten; Eñautek (Agirre) esan zidan. Berarekin ondo moldatzen nintzenez, batera sartu ginen.
Zein erronkari aurre egiteko ideiarekin hasi zineten?
Ideiak berehala etorri ziren. Eñautek bazeukan buruan Burbunak eta Etsayak, eta nik, Ipuin Faktoria. Ipuinetan (mundu guztikoak antzekoak dira), badago mezu unibertsal bat, eta beraz, buruan neukan euskera erabiltzekoa beste kulturekiko zubi gisa. Horiek izan ziren lehenengo bi proiektuak. Gero beste batzuk sortuz joan ziren; esate baterako, Bota Bertsoa. Eta lehendik zeuden proiektuei ere jarraipena eman nahi genien, noski; udalekuak... Eta Kronikari, noski. Kronika zen eta da proiekturik garrantzitsuenetarikoa. Kronikarekiko hartu genuen erabakia izan zen kazetaritza independientearen alde egitea, eta horretarako, nik bateren bati ikasi nion onena zela kazetaria bakean uztea bere lanean. Uste dut erabaki ona izan zela. Hori da kazetaritza independientearen baldintza.
Nahikoa lan eginda bukatu duzu, orduan.
Ez dut bukatu erreta edo nekatuta edo estresatuta. Fresko nago. Baina ikusten dut lau urte baino gehiago kaltegarria dela. Bizi guztirako postuen kutsu hori hartzea kaltegarria da norberarentzat, erakundearentzat eta denentzat. Eta uste dut hau tokatzen zaiela gazteei. Ikusi dudana urte hauetan izan da euskera, batetik, dela euskaldunon nortasunaren estandartea. Baina, aldi berean, euskera da faxismoaren banderetako bat. Hori ikusten da gaur egun VOXekin eta Nafarroan, eta Nafarroa guretzat ez da arrotza, Kronika Nafarroan ere zabaltzen baita. Bertan gertatzen dena euskeraren kontra ez da gauza bat guri ez dagokiguna. Gainera, ikusi izan dugu Kronika bera Gasteizko Parlamentura eraman zuela PPk, diru-laguntzak kentzeko. Aitzakia jartzen zen urtero eskela bat, baina asmoa zen euskerari, Kronika baita hemen inguruan euskeraren erreferente bat, zuzen-zuzenean jotzea. Horregatik uste dut hau dela gazteentzako bandera bat, erronka bat, euskera delako errebeldia bandera. Gazteak dira eguzkia goizeko 08:00etan bezala; egun guztia dute beraientzako, batetik, eta bestetik, ez dauzkate guk dauzkagun zauri, labankada, ikusiezin eta motxilak. Horregatik uste dut hau dela gazteentzako erakunde aproposa.
«Kronika da egunero-egunero xirimiria bezala bustitzen dijoan proiektua»
Izango dituzte proiektu berriak. Gainera, ez nago konforme esaten denean gazteak insolidarioak direla. Beraz, uste dut Doberaren bandera ere gazteek hartu behar dutela.
Kronikak ere badauzka erronkak, hortaz!
Doberak daukan proiektu garrantzitsuenetakoa da. Orain lauzpabost urte entzun nion Aldundiko euskera teknikari bati ari zirela alderatzen herrietako datuak eta euskeraren inguruko nolabaiteko hobekuntzak, eta Hernani zela bere tipologiako herrien artean emaitza onenak zeuzkanak; hobera gehien egin zuenetako bat. Eta esaten zuten hori zela Kronikari esker, Kronika zelako egunero-egunero xirimiria bezala bustitzen dijoan produktu bat. Hor dago, Erritmoa, kazetariaren batuta liburua ere; horko teorizazio guztiaren oinarria Kronikan dago. Gero sortu da Euskara Ari Du mugimendua ere, Hernanin, eta izango du bere eragina.
Zuzendaritza utzita, guztiz utziko duzu Dobera?
Proiektu batzuk, martxan jarri ditugunak edo jarri nahi ditugunak, ez ditugu utziko, inplikatuta gaudelako. Esate baterako, nobela grafikorako finantziazioa lortzen jarraituko dut. Baita ere, segiko dut Ereñotzuko aurreko udalak babestutako proiektuarekin, Jon Zabaletaren komiki bat hitanoan ateratzekoarekin. Eta Ipuin Faktoriatik, ipuinak kontatzeko deituz gero, prest nengoke. Oso esperientzia aberasgarria izan da Saharako ipuina Chejekin kontatzea, hark arabieraz eta nik euskeraz, edo Senegalgoa Bubaren wolofez... Eskoletara joan eta horrelako ekintzak egitea aberasgarria da. Askotan hitz egiten da aniztasunaz, eta egin behar dena da praktikan jarri.
«Buruan neukan euskera erabiltzea beste kulturekiko zubi gisa»
Datorrenarentzat zein erronka ikusten dituzu?
Euskaldun batzuk badaukagu joera bat elkarren kontra jartzekoa, dozena boto gehiago lortzearren, adibidez. Baina baita bestelako gauzetan ere. Uste dut horretan ez dutela erori behar. Ez dakit gu erori ginen, asmoa behintzat ez zen hori. Kondenatuta gaude euskaldunak elkarrekin hitz egin eta adostera, eta errespetatzera gu ez bezala pentsatzen duen jendea. Hori da, nik uste, erronka. Uste dut oraindik falta zaigula euskaldunoi ikastea kontrobersia ez dela txarra. Adibidez, Iruña-Veleiaren kasuan. Progresoa egongo bada, kontrobersiak egon behar du, bestela, beti jarraitzen duzu lehengo bidea. Ekialdeko kulturatan, adibidez, asimiliatua dute kontrarioak egon behar duela aurrera egiteko. Iruña-Veleiaren kasuan, esaterako, bereiztu genuen postura pertsonala (gutako batzuk Iruña-Veleia argitzearen alde gaude pertsonalki), baina Dobera bezala, ahalegindu ginen alde batekoak eta bestekoak entzuten. Aldekoak etorri ziren; Elexpuru eta... Baina Lakarrari ere gonbidapena egin zitzaion. Uste dut bidea hori dela. Nahastea iritzia eta pertsonak kaltegarria da, pertsonak beti errespetatu behar dira iritzien gainetik. Axeri Dantzaren inguruko dokumentala egitea ere niretzat atsegina izan da. Zumaiarra naiz, baina nahiko begi objektiboekin ikusi ahal izan ditut Axeri Dantzaren tripak. Ikusten da dela Hernaniko herriaren nortasun seinaleetako bat, eta gainera, musika eta dantzarekin, integratzeko modu oso on bat. Hor ere, Luis Telleriaren ekarpena ezinbestekoa izan zen berak sortu baitzuen axeri dantzariaren figura, eta kontrobersia haundiarekin! Baina azkenean alde guztietatik onartu dute. Beharbada ez da esportatzeko gauza bat, hemen bakarrik funtzionatu dezake. Ez naiz harritzen hernaniarrentzako harrotasun puntu bat izatea.