Sekulako jendetza bilduta eman zioten bukaera, Hernanin, atzoko greba egunari. Ehunka eta ehunka lagun elkartu ziren eskualde mailako manifestazioan, lan, pentsio eta bizitza duinaren aldeko aldarrikapenekin: «Gaur greba eguna da!», «jo ta ke irabazi arte», «hemen bizi, hemen erabaki», «lan, pentsio, bizitza duina», «borroka da bide bakarra», «bizitza lanean, orain mixeria» edota «1080 gutxienez ere», oihukatu zituzten.
Plazatik abiatu eta Lizeaga auzoan sartu zirenean, ikusgai izan zen manifestazioaren bolumena: aurrenekoak auzoa inguratu eta Tilosetara iristen ari zirenean, azkenekoak Lizeaga kalearen erdi parean zeuden oraindik. Ibilbide luzea egin zuten, gainera: berriro Plazan sartu, Kaxkoa zeharkatu, Izpizua kaletik igo, Elkanotik jaitsi, Zinkoeneara iritsi, eta Kale Nagusitik gora Plazaraino.
Horrela eman zioten bukaera, «jarraipen zabala» izan zuen greba orokorrari, deitzaileen esanetan: «egun haundia» izan zela nabarmendu zuen ELA sindikatuak, eta «historikotzat» jo zuen LABek.
Mitxel Lakuntza (ELA): «mobilizazioek izan duten jarraipen izugarria ikusi besterik ez dago, konturatzeko helburuak bete direla; enpresak hustu eta kaleak bete direla».
Zerbitzu publikoek eta merkataritzak bat, industriako «jarraipen oso zabalarekin»
Ezohiko asteguna zela nabaria izan zen Urumea bailaran, goizean goizetik. Denda eta taberna gehienak itxita ageri ziren, herrietako kaleetan. Baina bereziki, grebak industrian izan zuen eragina nabarmendu zuen Euskal Herriko Eskubide Sozialen Kartak: «oso jarraipen zabala izan du industrian; ekoizpena ia gelditu egin da enpresa haundi askotan, eta industriagune ugari itxi da. Gipuzkoan ia erabatekoa izan da».
Eta industriako jarraipenari, goizak aurrera egin bezala, zerbitzu publikoak eta merkataritza batu zitzaizkiola azaldu zuten grebaren deitzaileek. Zentzu horretan, azaldu zuten gutxieneko zerbitzuak besterik ez zituztela eskaini garraio publikoko linea askotan, «erabat gehiegizkoak, lehenago ere salatu izan dugunez». Eta kritikatu zuten, baita ere, enpresetan ere, zerbitzu minimoak «abusuz» baliatu zituztela. Era berean, «Ertzaintzak eta beste polizia batzuek ezarritako debeku, isun eta oztopoak» ere salatu zituzten: «saio politiko horrekin, indarra kendu nahi izan diote greba orokorrari, baina herritarren mobilizazio haundiak galarazi du asmo hori».
145.000 lagun hiriburuetan, eguerdiko mobilizazioetan
Goizean eta eguerdian, euskal hiriburuetan deitutako mobilizazioekin egin zuten bat, bailarako herritarrek. Donostian eta Iruñean, 35.000na lagun bildu ziren, eta 145.000 lagun izan ziren guztira (50.000 Bilbon eta 25.000 Gasteizen). «Mobilizazioek izan duten jarraipen izugarria ikusi besterik ez dago, konturatzeko helburuak bete direla; enpresak hustu eta kaleak bete direla», nabarmendu zuen ELA sindikatuko idazkari nagusiak, Mitxel Lakuntzak. Bere aldetik, Garbiñe Aranburu LABeko idazkari nagusiak adierazi zuen, lortu dela «Euskal Herriko langileon borrokan mugarri berri bat jartzea, eta herri honetako historian gogoan izango den egun bat izatea».
Udaberrian «borroken loraldi berria», eskakizunak erantzun ezean
Aranburuk berak ohartarazi zuen, udaberrian «borroken loraldi berria» ekarriko dutela, «bi hilabetetan Patronalak eta instituzioek gure eskakizunak erantzuten ez badituzte. Gaur ez da ezer amaitzen, gaur aro berri bat irekitzen da. Badugu hamaika arrazoi borrokan jarraitzeko, eta irabaziko dugula sinesteko».
Lakuntzak, berriz, adierazi zuen grebaren aldarrikapenak ezin direla egon «agenda politikotik kanpo.