Ez zeukaten asteburu erraza, Hernani eta Mundarroko mutilen talde nagusiek, etxetik kanpo aritu baitziren biak, kontrario arriskutsuen zelaian. Baina lanak primeran egin, eta garaipen banarekin bueltatu ziren.
Errenterian aritu zen Hernani, Touringen kontra. Eta Aitor Elizalderen golari esker, eta defentsan sendo arituta, hirugarren garaipena lortu zuten segidan (0-1). Horrela, hirugarren postura igo dira, Anaitasuna bigarrena bi puntura dutela.
Kostkasen zelaian nagusitu zen Mundarro, Donostian (1-2). Aurreneko zatian deseroso aritu arren, azkeneko minutuan lortu zuen aurreneko gola Iñurrik, eta lasaitasun horrekin, nagusi izan ziren moreak, bigarren zatian. Baina epaileak kendutako gol bat tarteko, partidutik atera ziren, eta berdintzeko aprobetxatu zuen kostkasek. Horrek berpiztu zituen moreak, eta nagusi izan ziren berriro, 10 minuturen faltan Ikerrek bigarrena lortu zuen arte, kontraerasoan.
Euskal Ligan, aldiz, galdu egin zuten Hernaniko neskek, Elorrioren zelaian (2-0). 11garren postuan daude orain.