Ohiko deialdian egingo dute bihar, Astigarragan eta Hernanin, 2020ko aurreneko Plenoa. Arratsaldeko 19:00etan hasiko da bi kasuetan, udaletxeko pleno aretoan.
Gai orden laburra izango du Astigarragako Udalak, lantzeko; eta puntuen artean dago, 2020-2023 Plan Estrategikoaren aldaketari dagokiona ere. Horren aurretik, bi kreditu aldaketari buruz ariko dira; eta ondoren, U30 Greba Orokorroraren deialdia ere izango dute hizpide: Grebari buruzko «ebazpen proposamena» aurkeztuko du EH Bildu udal taldeak.
Bihar bertan, goizean, Ogasuna eta Ondarea Batzordearen bilera ere izango da, Astigarragan. 10:30etan daukate zita, eta hain justu, bertan landuko dituzte, ondoren Plenora eraman aurretik, bi kreditu aldaketak eta 2020-2023 Plan Estrategikoaren aldaketa. Kultur etxe berrirako ikus-entzunezko ekipoa kontratatzeko espedientea ere izango dute hizpide.
Hernanin, berriz, luzexeagoa daukate Plenorako gai ordena, bederatzi punturekin. Eta Greba Orokorra ere tartean izango da: mozioa aurkeztu du EH Bilduk. Horren aurretik, landuko dute, besteak beste, Ibaiondo poligonoko 29garren zenbakiko lursailaren xehetasun azterlana; eta Usurbilgo alkateak egindako eskaera, Zubietako erraustegiaren gaia Plenoan jorratzeko. Azkeneko hori, aurreko Plenora eraman zuten, baina presaz sartu zutela eta, oraingo deialdira atzeratzea erabaki zuten.