ASTIGARRAGA-HERNANI FUTBOLA
Asteburu ia borobila izan dute bailarako futbol taldeek. Baina emaitza onena Mundarroko Gorengo taldeak lortu du, denboraldiko bigarren itzulia hasteko 3 eta 1 irabazita bost postu gorago dagoen Deustori. Astigartarrak, gainera, nagusi izan ziren ia partidu osoan. Hasieran aurkariak hobeto zelairatu baziren ere, 20 minuturen bueltan erosoago sentitzen hasi ziren Mundarrokoak. Hiru golak, hala ere, bigarren zatian egin zituzten Iñakik, Iñurrik eta Josebak. Deustok azken hamar minutuetan erantzun zuen, baina ez zituen etxekoak gehiegi estutu.
Hernaniri dagokionez, mutilen ohorezko erregional mailako taldeak ere ederki hasi du bigarren itzulia, 3 eta 2 irabazita, postu bat beherago dagoen Beti Gazteri. Navarrok sartu zuen aurreneko gola, baina berdindu egin zuten aurkariek, eta baita bigarrenarekin aurreratu ere. Liza eta Bereziren golek eman zieten garaipena, azkenean.
Nesken Euskal Ligako taldeak, bestalde, bana berdindu zuen Barakaldoren kontra. Bide horretan hobetzen segiko dute.