Sekulako denboraldia daramakite Mundarroko neska jubenilek, Gipuzkoako Txapelketan; baina borobiltzea kostatzen ari zaie. Aurreneko fasean bikain aritu eta multzoko aurreneko postuan bukatu ondoren, sei talde onenekin batera ari dira orain, txapeldun izateko lehian. Baina momentuz, jokatutako hiru partiduak galdu dituzte; horietako bi, estu xamar.
Gaur bilatuko dute aurreneko garaipena, etxean, Urnietaren kontra. 16:00etan izango da, Astigarragako kiroldegian, eta herritarren animoak beharko dituzte, irabazteko.
Hernaniko neska jubenilak, berriz, 13-18 postuen lehian ari dira, eta orain arte partidu bat berdindu eta bi galduta, estreinako garaipena bilatuko dute haiek ere: Elgoibarren kontra bihar, 11:15etan, IMH ikastegian.
Eta mutil jubeniletan, azkenik, Oñatin ariko dira hernaniarrak, bihar 12:00etan, Aloña Mendiren kontra. 15-21 postuen lehian ari dira, garaipen bat eta hiru porrotarekin.