Jardunaldi polita izango dute asteburu honetakoa, Hernaniko eta Mundarroko futbol talde nagusiek. Etxean ariko dira txuri-berdeak, nesken Euskal Ligan eta mutilen Ohorezko Erregional mailan; eta etxean ariko dira moreak ere, mutilen Erregional Preferenteetan. Gaur jokatuko dute mutilek, 16:30etan Zubipen eta 15:30etan Zarkumendegin, hurrenez hurren. Eta biharkoan izango da nesken txanda, arratsaldeko 16:30etan Zubipen.
Partidu erakargarriak dituzte hiruek. Kontrario zuzenak izango dituzte aurrean txuri-berdeek, biek ere, postu bat aurretik duten taldea: Barakaldo neskek, eta Beti Gazte mutilek. Eta irabaziz gero, aurrea hartuko diete, sailkapenean.
Mundarrok, berriz, partidu zaila dauka, Deusto hirugarren sailkatuaren kontra. Nabarmen gorago daude donostiarrak, baina hori motibazio gehigarria izango da moreentzat, gaurkoan garaipena bilatu, eta gora egiten jarraitzeko.