Igandean hasi zen bola denboraldia, Taldekako Txapelketaren aurreneko tiraldiarekin, Legazpin. Eta ondo ekin diote, bailarako bolariek. Aurreneko postuan dago CD Hernani, 247 brila bota baitzituzten taldeko bolariek. Ategorrieta dago bigarren, 245 brilarekin.
Elur Txori, berriz, laugarren postuan dago, 231rekin; eta Ur-Mia bosgarren, 225ekin.
Miguel Aizpurua eta Ibon Miner, onenen pare
Hiru taldeetako kideen artean, bereziki ondo aritu ziren Miguel Aizpurua hernaniarra eta Ibon Miner ereñotzuarra. 46na brila bota zituzten, eta laugarren eta bosgarren izan ziren, baina Iñaki Berasategi bigarrenarekin eta Jon Orekain hirugarrenarekin berdinduta. German Gereñok bota zituen gehien (47).
Iñaki Minerrek, berriz, 45 brila bota zituen.
Nesketan, Villabonako Behar Zana taldea dago aurreneko postuan, 157 brilarekin.
Finalera pasea jokoan, datorren igandean Añorgan
Taldekakoaren bigarren tiraldia, datorren igandean izango dute, Añorgan. Eta bertan botatako brilak eta Legazpikoak batuta, jakingo dute zein talde pasako diren A multzotik, urtarrilaren 25ean Olaberrian jokatuko den finalera.