Igandean jokatu zituzten pistako txirrindularitzako Gipuzkoako Txapelketak, Donostian, Anoetako belodromoan. Eta podiumera igotzea lortu zuen Naya Mangas hernaniarrak. Hirugarren sailkatu zen neska juniorretan, proba guztietan maila ederrean aritu ondoren.
Mutil juniorren mailan, berriz, 9garren izan zen Iker Iriondo hernaniarra. Eta mutil kadeteetan, azkenik, bailarako bost txirrindularietatik onenak izan ziren Tasio Semperena astigartarra eta Unax Urretabizkaia hernaniarra, 11garren eta 12garren sailkatuta.
Lau onenen artean Mangas, proba guztietan
Lau proba jokatu zituen Naya Mangasek, eta guztietan aritu zen onenen artean: aurreneko lau postuetan sailkatu zen guztietan, neska juniorrak eta kadeteak elkarrekin zirela. Hasteko, bigarren izan zen scratch proban; laugarren sailkatu zen gero, tempoan zein eliminazioan; eta beste bigarren postu batekin bukatu zuen txapelketa, puntuazioan.
Horrela, sailkapen nagusiko hirugarren izan zen, 120 punturekin, Arene Etxarri (127) eta Garazi Estevezen (125) atzetik.
Scratchean bigarren, Iriondo
Mutil juniorretan, ez zen sailkapen nagusiko onenen artean izan Iker Iriondo, baina proba batean, sekulako emaitza lortu zuen: bigarren izan zen scratch proban. Gero, 12garren izan zen tempoan zein eliminazioan, eta 13garren puntuazioan, sailkapen nagusiko 9garren postuan bukatzeko txapelketa, 74 puntu pilatuta.
Maila horretan, Asier Pozo izan zen onena, 126 punturekin, Haritz Sein (116) eta Haimar Etxebarriaren (113) aurretik.
Aner Zilbetik bigarren postua, kadeteen tempoan
Mutil kadeteetan izan ziren Urumea bailarako partehartzaile gehien; guztira, bost txirrindulari: Tasio Semperena astigartarra; eta Aner Zilbeti, Ekhi Muñoz, Unax Urretabizkaia eta Markel Rodriguez hernaniarrak.
Lau proba jokatu behar izan zituzten haiek ere. Eta aurrenekoan, tempo proban, lortu zuen emaitzarik onena, Zilbetik: bigarren sailkatu zen hernaniarra, Beñat Garaiarren atzetik (Gipuzkoako txapeldun izango zena bukaeran). 11garren egin zuen Urretabizkaiak, 14garren Muñozek, 18garren Semperenak eta 27garren Rodriguezek.
Scratchean, berriz, Rodriguez izan zen onena, 9garren eginda, eta segidan sailkatu zen Semperena, 10garren. 17garren eta 18garren izan ziren Urretabizkaia eta Muñoz, eta 22garren Zilbeti. Ezin izan zuten bukaerara arte iraun, eliminazio proban; eta 10garren eta 11garren izan ziren Semperena eta Urretabizkaia, hurrenez hurren. 17garren sailkatu zen Rodriguez, 19garren Muñoz, eta 26garren Zilbeti. Eta puntuazioan, azkenik, Urretabizkaia eta Muñoz izan ziren onenak, 9garren eta 10garren. 14garren egin zuen Zilbetik, 15garren Rodriguezek, eta 18garren Semperenak.
Emaitza guzti horiekin, Semperena izan zen sailkapen nagusiko aurrenekoa, 11garren postuan, 50 punturekin; eta puntu berberak eskuratuta izan zen 12garren Urretabizkaia. 14garren sailkatu zen Zilbeti, 40 punturekin; 16garren Rodriguez, 33 punturekin; eta 21garren Muñoz, 26 punturekin.
164 punturekin izan zen txapeldun Beñat Garaiar, Eneko Arozena (132) eta Daniel Fursencoren (102) aurretik.
Neska kadeteen eta 23 urtez azpikoen txapelketak ere jokatu ziren, bailarako partehartzailerik gabe; eta Amaia Astarloa eta Eukene Larrarte izan ziren onenak, hurrenez hurren.
Bio Racer Sariaren azkeneko jardunaldia, igandean
Beste zita garrantzitsu bat izango dute datorren asteburuan ere, pistako txirrindularitzan. Izan ere, Bio Racer Sariaren 9garren eta azkeneko jardunaldia jokatuko dute, igandean 09:45etan hasita, Donostian bertan.
Scratch eta puntuazio probak jokatuko dituzte neskek; eliminazio eta puntuazio probak mutil juniorrek; eta tempo eta puntuazio probak mutil kadeteek. Sariko hirugarren postua dauka jokoan, Naya Mangasek.