Asteburu honetan ekingo diote Iker Salaberria eta Aimar Olaizola goizuetarrek, binakako txapelketaren bigarren itzuliari.
Iruñeako Labriten jokatuko du Salaberriak gaur 17:45etan, Garmendiarekin, Egiguren V eta Erostarberen kontra. Zazpi partidutik bi irabazita, bigarren itzuli borobila osatu behar dute, aurrera egin nahi badute.
Olaizola, aldiz, Zumaiko Aitzurin ariko da bihar, 17:00etan. Urrutikoetxea lagun, Bengoetxea VI eta Mariezkurrena IIren kontra ariko da. Egoera berean dago bera, zazpitik bi irabazita.
Afizionatuen mailan, berriz, Gipuzkoako Trinkete Txapelketaren semifinalak jokatuko dituzte gaur, Iruran, bost hernaniarrek: Mattin Arluziaga, Unai Etxarri, Oinatz Insausti, Mikel Lasa eta Unai Alvarez.