Martxan jartzeko prest dira, Hernaniko eta Ereñotzuko bolariak. Bihar bertan hasiko dute denboraldia, eta Taldekako Txapelketarekin ekingo diote.
Hernaniko Elur Txorik eta CD Hernanik, eta Ereñotzuko Ur-Miak hartuko dute parte, eta A multzoan ariko dira hiruak, Behar Zana, Danantzako eta Ategorrietarekin batera. Legazpian dute estreinako tiraldia bihar, 09:00etatik 11:00etara eta 16:30etatik 17:30etara. Bigarrena hilaren 19an izango da, Añorgan, eta multzoko talde onenek, finala jokatuko dute urtarrilaren 25ean, Olaberrian, B multzoko onenekin.
Hortik aurrera, Binakako Txapelketari ekingo diote, hiru elkarteetako bolariek; eta Hernanin izango dute aurreneko tiraldia, urtarrilaren 26an. Hiru tiraldi eta Altzan jokatuko den finala izango dira, Binakakoaren kasuan.
Euskadiko Txapelketa Ereñotzun, ekainaren 6an
Banakako txapelketei, berriz, otsailaren 16an ekingo diete. Lehendakari Txapelketa jokatuko da aurrena, bost tiralditan; Gipuzkoako Kopa gero, beste bost tiralditan; eta Gipuzkoako Txapelketa ondoren, maiatzaren 16an Zerainen.
Baina urteko zitarik garrantzitsuena, Ereñotzun izango da aurten: Euskadiko Txapelketa jokatuko da, ekainaren 6an.