Urte bukaera txarra ahaztu eta berriari ondo ekiteko asmoz, gaur bueltatuko dira lehiara, mutilen talde nagusiak, Gipuzkoako 1go mailan. Eta partidu berezienarekin ekingo diote, gainera: derbia jokatuko dute, gaur arratsaldeko 18:00etan hasita, Astigarragan.
Ez dira denboraldiko unerik gozoenean iritsiko, Mundarro eta Hernani. Azkeneko partidua irabazi zuten hernaniarrek, baina aurreko seiak, ordea, galdu. Astigartarrek, berriz, azkeneko hiru partiduak galdu dituzte. Hori horrela, launa garaipenekin daude berdinduta, 11garren eta 12garren; eta beheko postuetatik ihes egiteko beharra daukate biek.
Oso bestelako egoera daukate Mundarroko neskek, Gipuzkoako bigarren mailan. Zortzi partidutik sei irabazita, hirugarren postuan daude; eta 2019ko azkeneko partiduan 45-6 irabazi ondoren, gogotsu ekingo diote urte berriari. Saski Axular taldearen kantxan ariko dira gaur, arratsaldeko 18:00etan, Donostiako Pio Baroja kiroldegian. Bi garaipenekin daude donostiarrak.
Gainerako mailetan ere, asteburu honetan bueltatuko dira lehiara, Mundarro eta Hernani. Mutilen Gipuzkoako hirugarren mailan, Lasarte-Orian ariko da Hernani, gaur 18:00etan, Ostadarren kontra; eta Alegian Mundarro, gaur 17:00etan, Elorri Aldapa taldearen kontra.