Larunbatean egin zen, 73garrenez, Errenteriako Gabon Kanten Lehiaketa ezaguna; eta bertan aritu ziren kantari, bailarako bi abesbatza; baita ederki aritu ere! Aurreneko sariarekin bueltatu zen Hernanira, Kantuban abesbatza, ezin hobeto eskaini baitzituen bere bi piezak, Alain Ayerdi zuzendari berriak gidatuta: Tan, tan! Erregeak datoz, Cesar Geoffrayrena; eta Candombe de San Baltasar, Abel Montenegro eta Liliana Cangianorena.
Horiekin, 800 euroko diru saria eta ikusleen txalo zaparrada ederra jaso zuten hernaniarrek, Galtzaraborda kiroldegiko harmailak beteta zirela. Bigarren izan zen Errenteriako Galtzagorri abesbatza, eta hirugarren Bergarako Orfeoi Gaztea.
Aurtengoan, ezin izan du saririk lortu Astigarragako Eragiyok abesbatzak, joan den urtean irabazle izan ondoren. Astigartarrek eskaini zituzten Aita Donostiaren Gabon eta Benito Orbegozoren Olentzero bidasotarra piezak, Eneko Amundarainek zuzenduta.
Zazpi abesbatza aritu ziren larunbat arratsaldeko saioan, eta lehiaketaren bukaeran, guztiek elkarrekin abestu zuten azkeneko pieza: Hator, hator.