Gabonetako egun seinalatuen artean, oporraldiaz gozatzeko aukera zabala izango dute Urumea bailarako haur eta gaztetxoek, egun hauetan. Eta gaur bertan, denetik izango dute.
Hernanin, joan den astelehenean bezala, ludoteka jarriko dute kiroldegian, gaur eta bihar, goizeko 10:00etatik 13:00etara. Eta bi tailer ere izango dira gaur; biak ere, Biterin. Batetik, zirku tailerra antolatu du Gaztelekuak. Eta bestetik, Sormen Tailerra hasiko da 11:00etatik 13:00etara, 2004-2007 urteen artean jaiotakoentzat; aurrez izena eman behar zen, eta lau eguneko tailerra izango da, Uxue Bereziartuaren eskutik.
Haur parkea Astigarragako kiroldegian, goiz eta arratsalde
Aukera hirukoitza izango dute Astigarragan ere, gaur. Hasteko, urtero bezala, haur parkea jarriko dute kiroldegian, goiz eta arratsalde; 11:00etatik 13:30etara eta 16:30etatik 19:30etara. Doan izango da sarrera, eta denetik egongo da: haurrentzako ludoteka, txirristrak, giza-erratza, puzgarriak, triziklo elektrikoak, futboleko atea, Wipeout pasabidea... Gainera, Herri Eskolako atarian, talo tailerra izango da goizean, eta ogi eta pasta tailerra arratsaldean, norberak egin eta jateko.
Gaur zabalduko ditu ateak, kultur etxeko jolas aretoak ere. Irekia eta doakoa izango da sarrera han ere; goizez 11:00etatik 13:00etara, eta arratsaldez 16:00etatik 18:30etara. Bihar, etzi, hilaren 31n eta urtarrilaren 3an ere egongo da zabalik.
Eta azkenik, bihar eta etzi beste aukera bat ere izango da, herriko hiru plazatan jarriko baititu ohe elastikoak eta puzgarriak, Astiko elkarteak: Joseba Barandiaran, Norberto Almandoz eta Kontxa Etxeberrian, 11:00etatik 13:30etara eta 17:00etatik 20:30etara.
Eta Ereñotzun ere izango da jolaserako tartea. Izan ere, mahai jolasak jarriko dituzte bihar, arratsaldeko 16:30etatik aurrera, frontoian.
Zinea Portu auzoan, antzerkia Biterin eta ipuinak Goizuetan
Haurrentzako beste hiru ekintza ere badira bailaran, gaur eta bihar. Hasteko, Hernaniko Portu auzoan, haurrentzako pelikula bat jarriko dute gaur, arratsaldeko 17:00etan hasita.
Biteri kultur etxean, berriz, Burbuilak haur antzerkia eskainiko du bihar, 18:00etan, 7 Burbujas konpainiak. Sarrerak salgai daude, 3 euroan.
Eta Goizuetan, Amonaren istorioak haurrentzako ipuin kontaketa eskainiko du bihar, 17:00etan Xalto eskolako jangelan, Amaia Elizagoienek.