Beste urte batez, berezia izan zen abenduaren 24a, Gabon Gauekoa, Urumea bailaran. Olentzero eta Mari Domingiren etorrerak argituta, hamaika txokotan aritu ziren kantari herritarrak, kalera atera ziren musikariak ere, eta ehunka gaztetxo bildu ziren bi bisitari berezien inguruan. Goizean zein arratsaldean, bailarako herrietako kaleetan barrena ibili ziren, haurren gutunak, muxuak zein txupeteak jasotzen, eta goxokiak banatzen.
Eta gauerdia igarota, berriro egin zuten herriz herri eta etxez etxeko erronda, opariak uzteko; haur eta heldu lotan zeudenean, atseden hartzen, egunean zehar ahotsa urratu gabe kantari aritu ondoren. Dagoeneko bueltatu dira mendira, baina datorren urtean bueltatu arte, mezu bat utzi diete Urumea bailarako herritar guztiei: zintzoak izan eta ondo portatu daitezela. Bestela, ikatza soberan daukala etxean, ekartzeko...
