Gabon Gauari hutsik egin gabe, Urumea bailarako herrietara egingo dute bisita gaur, Olentzerok eta Mari Domingik. Eta haien etorrerarekin batera, egun bereziari doinua jarriko diote musikak, kantuek eta bertsoek. Izan ere, talde ezberdinak aterako dira kaleak alaitzera.
Goizean egingo dute Astigarragara bisita biek, eta Santiomenditik jaitsita, 11:30etan iritsiko dira herrira. Herri Eskolako atarian elkartuko dira haurrekin, eta kalez kale ibiliko dira denak elkarrekin. Eta ondoren, udaletxeko balkoira igoko dira Olentzero eta Mari Domingi, haurrekin batera abesteko.
Eta arratsaldean, berriz, preso eta iheslarien aldeko Olentzeroa aterako da, 16:00etan Oialumetik.
Musika Banda, bertsolariak eta Kantuz abesbatza, Hernanin
Hernanira, berriz, arratsaldeko 18:00etan iritsiko da Olentzero, eta Kaxkoan barrena ibiliko da; baina ibilbide ezberdina egingo du aurtengoan: Plazara iritsi, eta kale-buelta musikatua hasiko du Ttarlako dantzariekin batera, Andre Kaletik behera jaitsi, Plaza Berri zeharkatu, eta Kale Nagusitik berriro Plazara igota. Bertan dantzatuko dute Ttarlako gaztetxoenek, eta segidan, 19:00ak aldera, haurren gutun eta muxuak jasoko ditu Olentzerok, 20:30ak arte.
Hori baino lehen, kale bueltan aterako dira Kantuz abesbatzako kideak ere, 12:00etan Milagrosatik abiatuta. Eta baserriz baserri ibiliko dira Iraulio Panttalone Bertso Eskolako kideak, Olentzero hartuta, arratsaldeko 16:00etan Iparragirretik.
Eta Olentzero Kaxkoan zehar ibili ondoren, Musika Bandako kideak izango dira, kale horiek alaituko dituztenak, 20:00etan egingo baitute erronda.
Ereñotzun, berriz, eguerdiko 14:15etan elkartuko dira Txirrita eskolako patioan, eta bertatik abiatuko dira Gabon kantuan, haur eta gurasoak.
Olentzerorekin hiru kale buelta, goizuetarrek
Goizuetan, behin ez, hiru bider ibiliko dira herriko kaleetan barrena, Olentzerorekin. Aurrena, goizeko 11:00etan abiatuta, Xalto eskolakoak aterako dira gabon eskean, eta DBH2koek ikas bidaia egin dezaten izanen da bildutako dirua.
Gero, arratsaldeko 15:30etan, aterako da presoen aldeko Olentzeroa, eta etxez etxe ibili ondoren, poteoa eginen dute iluntzean, ohi bezala.
Eta azkenik, Mari Domingirekin batera iritsiko da Olentzero, 18:30etan. Txino auzoan eginen diete ongietorria, eta herrian barrena ibili ondoren, goiko frontoian egonen dira.
Baina denetan goiztiarrenak aranoarrak izanen dira, goizeko 09:00etan jarri baitute hitzordua Suron. Olentzero hartuta ibiliko dira etxez etxe eta baserriz baserri, kantuan.
GABON GAUEKO EGITARAUA
ASTIGARRAGAN
11:30, Olentzero eta Mari Domingiren etorrera, Xaguxar aisialdi taldeak antolatuta. Satiomenditik jaitsiko dira, eta Herri Eskolako atarian haurrekin elkartu ondoren, herriko kaleetan zehar ibiliko dira. Bukaeran, udaletxeko balkoitik abestuko dute haurrekin batera, eta bertatik agurtuko dituzte.
16:00, Euskal preso eta iheslarien aldeko Olentzeroa, Oialumetik abiatuta. Herriko kaleetan barrena ibili, eta 19:00etan elkarretaratzea egingo dute Joseba Barandiaran plazan.
HERNANIN
12:00, Gabon Gaueko kale buelta, Kantuz abesbatzak, Milagrosatik abiatuta.
16:00, Olentzerorekin baserriz baserri, Iraulio Panttalone Bertso Eskolakoak, Iparragirren hasita.
18:00, Olentzero Kaxkoko kaleetan barrena, Ttarla dantza taldeak antolatuta.
20:00, Gabon Gaueko erronda, Musika Bandak, Kaxkoan barrena.
EREÑOTZUN
14:15, Gabon kantuan aterako dira, Txirrita eskolako ikasle eta gurasoak, eskolatik abiatuta.
ARANON
09:00, Olentzero hartuta, etxez etxe kantari, Surotik abiatuta.
GOIZUETAN
11:00, Xalto eskolako Olentzeroa, herriko kaleetan barrena.
15:30, Presoen aldeko Olentzeroa, etxez etxe. Iluntzean, poteoa eginen dute.
18:30, Olentzero eta Mari Domingiren etorrera. Txino auzoan egingo zaie ongietorria, eta herritik bueltaxka egin ondoren, goiko frontoian egongo dira.