Bihar da Santo Tomas eguna, eta aurreko asteburuan dagoeneko ospakizunak izan baziren ere, txistorradak egingo dituzte egun hauetan, bailaran.
Ereñotzun izango dute aurreneko hitzordua, gaur eguerdian, urteroko ospakizunarekin. Talo eta pintxo postuak jarriko dituzte Txirrita eskolan, baina ikasle eta irakasleek ez ezik, guraso eta auzotarrek ere izango dute festara batu eta txistorradaz gozatzeko gonbitea. Goizeko 11:30etan hasiko dute hamaiketakoa, ereñotzuarrek.
Eta gaur bertan, Hernanin ere izango da txistor jaterik. Zelabide auzo elkarteak, aurten aurrenekoz auzoko jaiak ez ezik, Santo Tomaseko txistorrada ere antolatu du. Gabriel Zelaia plazan izango da, arratsaldeko 18:00etan hasi eta 21:00ak arte.
Txistor jatearekin, saskien zozketak eta sari banaketak Goiz Eguzkin eta Lizeagan
Santo Tomas egunarekin jarraituko du festak, bihar. Urteroko zita jarri du Goiz Eguzki jubilatuen elkarteak ere; eta 11:00etan hasita, gonbidatuei harrera egin eta banatuko dituzte udazkeneko karta eta herri jolas txapelketetako sariak. Ondoren, Gabonetako lau saski zozketatuko dituzte; eta azkenik, txistorrada izango da.
Bihar egingo dute txistorrada Hernaniko gaztetxoek ere, Gaztelekuan. Eta Donostian jarriko du postua San Joan Konpartsak, Gipuzkoa plazan.
Eta bukatzeko, iganderako jarri du hitzordua Gibelaldek, Lizeagako auzo elkarteak. Eguerdiko 12:30etan jarriko dute postua, Urumea ikastolan; eta saski bat zozketatuko dute 13:00etan, elkarteko bazkideen artean.
Etzi egingo dute txistorrada Portu auzoan ere, 12:00etan Ibarrolaburu plazan; eta bertan ere zozketatuko dute saskia.
EREÑOTZUN
GAUR
Txirrita eskolan, talo eta pintxo postuak, auzotar eta gurasoentzat. 11:30etatik aurrera.
HERNANIN
GAUR
Zelabide auzo elkarteak antolatuta, 18:00etatik 21:00etara Gabriel Zelaia plazan
.
BIHAR
Goiz Eguzkin: aurrena, 11:00etan, gonbidatuei harrera eta udazkeneko karta eta herri jolas txapelketetako sarien banaketa; ondoren, Gabonetako lau saskien zozketa; eta jarraian, txistorrada.
Gaztelekuan, txistor jana.
ETZI
Portuko auzo elkarteak antolatuta, 12:00etan Ibarrolaburu plazan. Ondoren, Gabonetako saskia zozketatuko dute.
Gibelalde auzo elkarteak
antolatuta, 12:30etatik aurrera Urumea ikastolan. 13:00etan
saski bat zozketatuko da bazkideen artean, eta beste bi saski emango zaizkie, etxearen kanpoaldea ondoen apaindu duten auzotarrei (gaur egingo dute horien balorazioa).