Hiru musika emanaldirekin gozatzeko aukera izango da gaur, Urumea bailara osoan.
Aurrenekoak, astigartarrak izango dira. Aiztondo abesbatzak Norberto Almandoz musika eskolako ikasleekin egingo du emanaldia Andre Maria elizan, 12:30etan. Baina aurretik, 10:00etan eta 10:30etan, musika eskolako aretoan ariko dira tailerretako ikasleak.
Goizuetan ere, elizan izango da kontzertua, 12:30etan: herriko haurrak eta Umore Ona abesbatza ariko dira elkarrekin.
Hernanin, bestalde, Goizetik Udal Txistulari Taldeak joko du Gabonetako kontzertu berezia, 13:00ean Milagrosan. Biolin eta piano-joleen laguntza ere izango dute, eta Juan Jose Arregi apaizaren musika ibilbideari egingo diote errepasoa, eskerrak ematearekin batera.
Ereñotzukoa, atzeratuta
Bestalde, hilaren 17an Gabonetako kontzertua ematekoak ziren Txirrita eskolako haurrak, Ozenki abesbatza eta Doinu Zale akordeoi orkestra, Ereñotzuko elizan. Baina atzeratu egin dute, hilaren 18ra. San Antonio elizan izango da 19:00etan.