Herritik gertuago ariko dira gaur, laugarren jardunaldian, Aimar Olaizola eta Iker Salaberria goizuetarrak. Iruñako Labriten jokatuko dute, 17:45etan hasita. Aurrena, Promozio Txapelketakoa izango du Salaberriak, Garmendiarekin, Agirre eta Eskirozen kontra; eta ondoren, Binakako Txapelketa Nagusian ariko da Olaizola, Aretxabaletarekin (Urrutikoetxearen ordez), Altuna III eta Ladis Galarzaren kontra. Bihar, bi esku pelotari hernaniarrek dute zita garrantzitsua, 10:30etan hasita Elizondon: Baztango Txapelketaren finala jokatuko dute. Aurrena, infantiletan, Aiur Elizazu ariko da, Garaikoetxea nafarrarekin, Oiarpeko Etxeberria eta Leoneten kontra; oiartzuarrak dira faborito. Eta ondoren, kadeteetan, Jon Jarak jokatuko du, Eskuza arabarrarekin, Tolosako Amiano II eta Iztuetaren kontra; partidu berdindua espero da.