Ilunben kantatzea zer den badakienaren lasaitasunarekin, eta azkeneko urtean berreskuratutako konfiantzarekin, ariko da gaur Agin Laburu astigartarra, Gipuzkoako Bertsolari Txapelketaren finalean. Arratsaldeko 17:00etan izango da, Donostiako ohiko eszenatokian; eta alboan izango du Beñat Gaztelumendi añorgarra, Iraulio Panttaloneko bertso eskolakidea. Haiekin batera, beste sei lagun: Alaia Martin, Oihana Iguaran eta Jon Maia errepikatzaileak; eta Ane Labaka, Nerea Elustondo eta Beñat Lizaso, debutariak. Elustondo legazpiarra, Hernaniko bertso eskolara ere gerturatzen da, prestatzera.
Zortzikoteko ardi beltza izanagatik ere, bere estiloari eutsi nahi dio astigartarrak, saioan: «buruak eskatzen dit ni izatea, eta nire estilotik kantatzea. Zein zortzikote garen ikusita, beste zazpien aldean estilo nahiko desberdina daukat, baina garrantzitsuena da bakoitzak bereari eustea; eta hortik aurrerakoa, izan dadila ondorio bat, eta ez helburua. Emaitzetan pentsatzen hasiz gero, arriskua dago frustrazioak erakartzeko».
Konfiantza eman diote Labururi, aurreko bi saioek: «demostratuta geratu da, ondo eginez gero, gure estiloan ere oso aurrera iritsi daitekeela; musean jokatzeko karta guztiek balio dutela, baita txapelketa formatuan ere. Beraz, nire kartekin jokatuko dut. Konfiantza daukat ondo jokatuko ditudala, eta horrek, finalari eta lehiari begira, emaitzak eman ditzakeela».
Nortasun horri eutsiz gero, «lasai» etxeratuko da astigartarra: «tokatu daiteke saio txarragoa, hobea edo parekoa egitea. Ikasi dut erlatibizatzen, final honek izan dezakeen eragina. Ondo ateratzen bada, ba oso ondo; eta ez bada ondo ateratzen, beste zazpi finalistei eskua eman, eta lasai lo egiteko moduan etxeratuko naiz».
«Guztiok gure maila emanda, oso final polita izan daiteke, kantatzeko zein entzuteko»
Hirugarren finala izango du Agin Laburuk, eta laugarrena Beñat Gaztelumendik; duela lau urte txapeldun, eta aurreko bietan txapeldunorde. Hogei urterekin aritu zen buruz burukoan añorgarra, ohikoaren salbuespen izateko: «gogoratzen naiz, aurreneko finalera joan nintzenean, ez neukala bisualizatuta Ilunbe zer zen», dio Laburuk; «eta horrek, neurri batean, jan egiten zaitu. Orain bisulizatuta dauzkat eszenatokia eta aretoa, eta lasaitasun horrek lagunduko du, zalantzarik gabe».
Egoera berri horretara egokitu beharko dute hiru finalistak; «baina guztiok gure maila ematen badugu, oso final polita izan daiteke, kantatzeko zein entzuteko. Kanturako oso zortzikote atsegina da».
Laburu zein Gaztelumendi, beraien saioak irabazita sailkatu dira, bai final laurdenetan, eta baita finalerdietan ere. Azkeneko horretan, bi puntuazio altuenak izan ziren haienak; eta final laurdenetan, astigartarrak lortu zuen onena: «hala ere, Irunen tentsio eta erantzukizun haundia eraman nuen, eta saioa gaizki hasi eta buelta eman behar izan nion. Arrasateko finalerdian, berriz, saioa ondo hasita, horri eustea tokatu zitzaidan, eta askoz ere gustorago aritu nintzen. Sentsazioa daukat behetik gora nijoala, progresioan; eta landu ere, horretarako egin dut. Ea ondo neurtu dudan, eta orain arteko saiorik onena finalean ateratzen zaidan», dio Laburuk.
Buruz burukoaren atarian geratu zen orain lau urte: kartzelako saiora aurrena iritsi, eta bertan hartu zioten aurrea, Gaztelumendik berak eta Alaia Martinek: «gure estiloan, kartzelakoak jarraituko du puntu ahula izaten, ofiziotako bertsolariak garelako gehiago. Baina landu dut, zalantzarik gabe. Duela lau urte ere landuta neramakien, baina beharbada okerreko norantza batean, edo ez nion sinesgarritasunik ematen nire buruari, buruz burukoa lehiatu nezakeela. Aurten bai, ematen diot sinesgarritasun hori; bai ikusten dudala nire burua besteen pare, egin dezakedala besteek adina. Eta ikusten badut nire burua hor, bakarkakoan gehiago lehiatuko dut».
Dena den, orain lau urte ez, duela bi urte jaso zuen «kolpe haundi xamarra» astigartarrak, bertsotan, beregan konfiantza galtzeraino: «baina azkeneko urtebetean berreskuratu dudala esango nuke, eta askoz ere lasaiago eta sueltoago ari naiz orain», azaldu du.
«Ez noa txapela berrestera; bertso bakoitza aprobetxatzen saiatuko naiz»
Labururi ihes egin zion buruz buruko hura, Gaztelumendik irabazi zion Alaia Martini, azkeneko txapela janzteko; baina argitu du, horrek ez diola presioa gehitzen: «ez noa txapela berrestera. Uste dut lau urte hauetan gizartea eta bertsolaritza dezente aldatu direla. Ni ere ez nago duela lau urteko toki berean, eta orain nagoen toki horretatik kantatzera joango naiz. Bertso bakoitza aukera gisa hartuko dut, eta denak aprobetxatzen saiatuko naiz. Hortik aurrerakoa ez dago nire esku».
Finala zuzenean, interneten eta ETB4 telebista katean
Saioa ikusteko azkeneko sarrerak, eguerdiko 13:00ak arte eskuratu ahal izango dira interneten, bertsosarrerak.eus atarian; edo Ilunben bertan, arratsaldeko 15:00etatik aurrera.
Ateak 15:30etan irekiko dira, eta gomendatu dute garaiz eta garraio publikoan joatea. Izan ere, Realaren partidua izango da Anoetan, 16:00etan.
Telebistan edo internet bidez ere ikusi ahal izango da, zuzenean: eitb.eus eta bertsoa.eus web orrietan eta ETB4 katean, osorik emango dute finala; eta ETB1en, gaueko 21:00ak aldera egingo dute konexioa, finalarekin. Bihar, Hitzetik hortzera saio berezia izango da ETB1en, finalari buruz, 15:00etan.