Duela 3 urte hasitako proiektua, Beterri Errotuz laneratze enpresa, atzo aurkeztu zuten Hernaniko Iturola Elkarlan Sorgunean, Beterri Errotuz S.L.U, Beterri-Buruntza Udalek (Astigarraga, Hernani, Andoain, Lasarte-Oria, Usurbil eta Urnieta) eta Erroak Sartu Gizarteratze Elkarteak. Xabier Lertxundi, Hernaniko alkateak azaldu bezala, «eragile pribatu eta publikoen arteko elkarlanetik sortu da Beterri Errotuz. Laneratze enpresa da, gizarte bazterketa egoeran egon daitezkeen pertsonak gizarteratzen laguntzeko».
Mari Jose Izagirre, Beterri-Buruntzako lehendakariak ere «bazterketa egoeran dauden pertsonen inklusiorako proiektua garatu» izana nabarmendu zuen, eta «Aldundiak lagunduta, proiektu komunitario honek enplegu sozialeko ekosistema eta gobernantza eredua» dituela. Ildo horretatik, lehenago zaintza arlotan pertsonen arretarako herri plataforma proiektua sortu zela gogorarazi zuen, eta orain, ingurumenaren aldetik, laneratze enpresa sortu dela.
Era berean, eskerrak eman zizkieten proiektua lagundu duten Aldundiari, Lanbideri, La Caixari eta Gizatea, Euskadiko gizarteratze eta laneratze enpresen elkarteari eta sektore horretako ordezkariei.
Ingurumen arloko lanak
Enpresa irabazi asmorik gabekoa da, eta uztailean hasi zen martxan, langile bat eta bi peoirekin. Hemendik aurrera hazi, eta 2021erako laneratzeko postuetan 8 langile aritzea aurreikusten dute.
Langileen zerrendako %40-50 artean gizartean baztertuta edo arriskuan dauden pertsonak izan behar dute, eta gutxienez 6 hilabete eta gehienez 3 urterako kontratatu ahal izango dira; «egoera irregularrean daudenak erregularizatzeko aukera emango da horrela», baita ere.
Egingo dituzten lanak Udalen beharrak asetzeko izango dira. Ingurumen arloan, bide eta ibai inguruak garbitu eta mantendu, espezie inbaditzaileak kendu...; herri-guneetan, margoketak, jaietako eszenatokiak jarri eta kendu, seinalizazioak zaindu...; eta komunikazio arloan, kartelak jarri, buzoneoa eta mezularitza lanak.