Pelota jardunaldi oparoa izan da. Aipagarriak izan dira Aiur Elizazu eta Jon Jara hernaniarren garaipenak, eta horri esker, Baztango Txapelketaren finalak jokatuko dituzte igandean. Elizazu infantila da eta Garaikoetxea nafarrarekin batera jokatzen ari da txapelketa, atzean. Finalerdian Txarutako Prim eta Goienetxe garaitu zituzten (18-15). Jara, berriz, aurrelari kadetea da, eta Baztanen Eskuza arabarrarekin ari da jokatzen. Finalerdian Oiarpeko Zabaleta eta Olaiz garaitu zituzten (18-9).
Garaipen garrantzitsuak lortu zituzten, beste hiru pelotarik ere. Astigarragako Eñaut Lizeaga jubenilak lehenengo mailan, eta Unax Uitzi eta Anartz Oiartzabal hernaniar jubenilek bigarren mailan, Gipuzkoako Txapelketaren hurrengo fasera sailkatzea lortu dute buruz buru. Hernaniarrek, erraz irabazi zuten, Izurun eta Eple taldeetako pelotarien aurka; eta jardunaldi baten faltan finalerdietan dira.
Eñaut Lizeagak, bere aldetik, aurreneko fasean partidu guztiak irabazi ditu; hirutik hiru, azkena Tolosako ordezkariaren kontra 22-15. Hurrengo fasean dago, beraz. Ekain anaia, ordea, ez da ariko ebakuntzaren ondorioz. Nagusietan Jokin Santxezek ere aurrerapausoa eman du, Gaztelekuren kontra emaitza berdinarekin irabazita.
Horiek denak emaitza positiboak; baina partidu garrantzitsuak ere galdu dituzte Urumea bailarako pelotariek, profesional zein afizionatuetan.
Olaizola eta Salaberriak, galdu
Profesional mailan, Aimar Olaizolak 22-14 galdu zuen Urrutikoetxearekin, Laso eta Albisuren kontra, Binakako Txapelketan. Eta Promozioko Txapelketan, Iker Salaberria ere galdu egin zuen, 22-21, Garmendia lagun.
Afizionatuetan, Hodei Exposito astigartarrak eta Markel Lizeaga hernaniarrak 22-13 galdu zuten, Olazar Torneoan. Eta Baztanen, Txintxurreta eta Azpeitia infantilek ere galdu egin zuten, finalerdietan.