Sagardo Apuruaren barruan 2019ko uztaren nondik norakoak azaldu zituzten eta aurten Euskal Herrian 12,2 milioi litro sagardo egin da. Gipuzkoan 11,3 bat milioi litro sagardo egin dira 2019ko uztan, aurreko urteetako kopuru beretsua. Gipuzkoako Sagardogileen Elkarteko sagardotegiek 8 milioi litro egin dituzte eta aurten aipatzekoa izan da bertako sagarraren garrantzia. Gipuzkoako Elkarteko kideen artean egindako sagardoaren %73 izan da bertako sagarrarekin egina.
Aurtengo uzta berezia izan da Gipuzkoan. «Oso mailakatua eta banatua. Espero moduan, udaberriko eguzkiak lorea ontzen lagundu du eta fruta asko izan dugu sagarrondoetan. Sagardoa usaimenari dagokionean intentsitate haundikoa da, gorputzeko sagardoak dira eta alkoholari dagokionean 6'o vol. inguruan» azaldu zuten Apuruan.
Produktua dibertsifikatzen ari da eta latan ere badago
Azpimarragarria da, bestalde, sagardo naturala ez ezik, sagardotegiak dibertsifikatzen ari direla produktua eta azken urteetako joerari jarraituta, sagardo bereziak egiteaz gain, packagingean ere inbertsioa egiten ari da sektorea.
«Horren adibide da aurkeztu berri den Euskal Sagardoa latan. Badira muztio pasteurizatua egin dutenak, sagardo apardunak, ondutako sagardoak egin dituztenak, izotzezko sagardoak eta oraindik ikertzen eta lantzen ari diren merkaturatu gabeko hainbat produktu berri gehiago. Produktu gama honen erakusleiho duzue www.sagardoa.eus web orrialdean dagoen online denda» esan zuten Donostian.
Sagardoaren inguruko azterketak eta sagasrti berriak
Gipuzkoako Sagardogileen Elkarteko 24 kidek ekoizten dute Euskal Sagardoa Jatorri Deitura. Jatorri Izendapenerako bidean sektoreak egindako ahaleginak eraginda eta Gipuzkoako Foru Aldundiak lagunduta, sagasti berriak aldatzen ari dira Gipuzkoan eta aurreikusten da datozen urteetan sagasti berri dezente izatea. «Aurten landaketa asko izango dira Gipuzkoan. Honek, mesede egingo dio eta bultzada haundia ematen dio Euskal Sagardoa Jatorri Deiturari. Horrez gain, orain dauden sagastietan ere hobekuntza planak egin nahi dira eta guzti honen helburua da %100 bertako sagarrez egitea bertako sagardo guztia etorkizun hurbil batean. Proiektu horretarako sagastiak jarri nahi dituzten eta lurrak dituzten baserritarren beharra ere bada, lur eremu dezente eta guztion lana beharko baita helburu hori betetzeko. Duintasuna kate osoan bermatu ahal izateko».