Jaialdi berean ariko dira gaur, aurreneko aldiz, Aimar Olaizola eta Iker Salaberria goizuetarrak. Bilboko Bizkaia frontoian jokatuko dute, 17:45etan hasiko den jaialdian. Binakakoaren hirugarren partidua jokatuko dute biek, eta biek bilatuko dute bigarren garaipena.
Salaberriak jokatuko du aurrena, Garmendiarekin batera, Elordi eta Etxebarriaren kontra, Promozioko Binakako Txapelketan. Eta ondoren jokatuko du Olaizolak, Urrutikoetxea lagun, Laso eta Albisuren kontra, Binakako Txapelketa Nagusian.
Sarrerak, interneten eskuratu daitezke, 15 eurotik aurrera: proticketing.com/pelotavasca.
Gainera, Pelota Eguna izendatu dute gaurko jaialdia; eta partiduez gain, beste hainbat ekintza izango dira: zaleen eta pelotarien arteko topaketa izango da aurrena, 16:30etan; eta Baikoko kamixetak, galtzak eta eskumuturrekoak zozketatuko dituzte ondoren, 17:30etan.
Lau hernaniarrek semifinala, Baztango Txapelketan
Zita garrantzitsuak izango dituzte esku pelotari hernaniarrek ere; bereziki, Baztango Txapelketan. Izan ere, semifinala jokatuko dute lau hernaniarrek.
Gaur, Auritz Txintxurreta eta Oier Azpeitia infantilek daukate zita, 18:30etan Elizondon, Andoaingo Lantzeta eta Segurolaren kontra. Bihar, Almandozen jokatuko du Aiur Elizazu infantilak 10:30etan, Garaikoetxea nafarrarekin, Amaiurreko Prim eta Goienetxeren kontra.
Eta bihar bertan Elizondon, 10:00etan, Jon Jara kadeteak jokatuko du, Eskuza arabarrarekin, Zabaleta eta Olaitz oiartzuarren kontra