Pista denboraldian murgilduta dabiltza txirrindulari astigartar eta hernaniarrak. Gaurkoan Bio Racer-Oiartzun Bike Sariko laugarren jardunaldia izango dute jokoan, Donostiako belodromoan, arratsaldeko 15:30etatik aurrera.
Horrez gain, igandean Gipuzkoako elkartearteko Kopako aurreneko jardunaldia jokatuko da. Kasu horretan, goizez egingo da proba: 09:00etatik 14:00etara.
Orain arte lan fina egin dute txirrindulari guztiek. Semperenatar anai zaharrenek, bestalde, Bartzelonan hartu dute parte, 23 urtez azpikoentzako Bio Racerren probarik ez dagoela-eta.
Semperenatarrak podiumera igo dira Bartzelonako pistako neguko proban; aurreneko eta hirugarren postuetan, hain zuzen.
Martxa politean, Bio Racerren
Bailarako ordezkaririk ez da falta Bio Racer proban, kadete nahiz juniorretan. Kadeteetan, Donosti Berri klubarekin ari dira parte hartzen Ekhi Muñoz, Markel Rodriguez, Unax Urretabizkaia eta Aner Zilbeti hernaniarrak, eta Tasio Semperena astigartarra. Juniorretan, bestalde, Bazpirekin ari dira Iker Iriondo hernaniarra eta Jaime Romero astigartarra, eta Enekoitz Azparren astigartarra Ampo taldean aritzen da.
Kadeteei dagokienez, Unax Urretabizkaia laugarren dijoa oraingoz; Ekhi Muñoz 8garren; Ane Zilbeti, 12garren; Markel Rodriguez 23garren eta Tasio Semperenak 31garren postuari eusten jarraitzen du. Sailkapenean lider, oraingoz, Aimar Gorriñobezkoa bizkaitarra da, eta bigarren postuan Donosti Berriko kidea dago: Yago Aguirre.
Bestalde, juniorretan ere bizkaitar bat da lider: Eder Moreno, Loiumat taldekoa. Enekoitz Azparren astigartarra aurreneko eguneko puntuazioari esker bigarren zijoan, eta scracht proba irabazi eta bigarren jardunaldian laugarren eginda, eliminazio proban laugarren egin zuen, eta 9garren, puntuaziokoan. Guztiarekin, bigarren dijoa sailkapen orokorrean. Iker Iridondo hernaniarra, berriz, zazpigarren. Kategoriako beste astigartarra, Jaime Romero, bosgarren izan zen aurreneko egunean, eta ezin izan zuen parte hartu bigarren jardunaldian, Espainiako Selekzioarekin aritu behar zuelako. Pasa den larunbatean, hala ere, eliminazio proban bigarren egin zuen, eta puntuaziokoa irabazi; beraz, 8garren dijoa.
Semperenatar zaharrenak, Bartzelonan
Urko eta Telmo Semperena, bestalde, Bartzelonan izan ziren pasa den asteburuan. Izan ere, gaztetxoagoak diren txirrindulari askok parte hartzen duenez Bio Racerren, ez da aukerarik izaten 23 urtez azpikoentzako probak antolatzeko. Horrela, bi Semperenatarrak Hortako belodromoan izan ziren, pistako Lliga d'Hivern jokatzen.
Bertan, Urkok aureneko postua lortu zuen bi probatan; tempoan eta scrachtean. Telmo ere fin ibili zen, eta hirugarren eta bigarren egin zuen proba horietan, hurrenez hurren.