Dantza eta kantu emanaldiak izan dira nagusi aste honetan Urumea bailarako eskoletan, Euskararen Egunaren harira. Hernaniko Urumea ikastolako ikasleak izan ziren ospakizunetan murgiltzen aurrenekoak; izan ere, Euskararen Eguna, San Frantzisko Xabierren Eguna ere badena, jai-eguna izaten dute, eta bezperan aritu ziren kantuan eta dantzan.
Hurrengo egunean, berriz, Euskararen Egunean bertan, bailarako gainontzeko ikastetxeetako ikasleak batu zitzaizkien. Hernanin bertan, eskola guztietan izan zuten eguna gogoan: Langilen, euskal kantuak abestu edota gurasoekin batera euskerazko esaera zahar, aho korapilo eta abarrekin altxor bilduma osatu zuten; Elizatxon, euskeraren aldeko leloekin blaitu zituzten patioa janzten zuten aterkiak, Euskara Ari Duela gogoraraziz, eta kantuan eta dantzan bukatu zuten; Inmakuladan, bestalde, herri kirolekin ginkana egin zuten helduenek, eta Txundi Gaitzazu! ikuskizuna osatu zuten gaztetxoenek.
Ereñotzun, gurasoekin batera frontoian elkartuta, jolas eta tailerrak egin zituzten, eta musika eta dantzan bukatu zuten.
Azkenik, Astigarragako Herri Eskolan, mailaka banatuta haurrek kantu eta dantza emanaldiekin gozatzeko aukera izan zuten.
Esperientziadun ahots euskaldunei, aitortza
Haurrez gain, helduek ere izan zuten zer ospatua Astigarragako kasuan. Besteak beste, antzerki emanaldiarekin gozatu ahal izan zuten: Bakean dagoenari bakean utzi.
Baina eguneko ekitaldi bereziena izan zen, beraien testigantzak www.ahotsak.eus webgunerako eman zituzten astigartarrei Udalak egindako aitortza. Proiektuaren helburua da Euskal Herriko ahozko ondarea eta herri hizkerak jasotzea, adinekoak elkarrizketatuta, eta orain arte, 36 astigartarrek hartu dute parte.