Alderantzizko emaitzak lortu dituzte asteburu honetan, bi esku pelotari profesional goizuetarrek. Estreinako jardunaldian galdu ondoren, aurreneko garaipena lortu du Iker Salaberriak, Promozioko Binakako Txapelketan: 19-22 irabazi zuen larunbatean, Garmendiarekin, Zabala eta Ruizen kontra. Eta aldiz, ezin izan zion segida eman Aimar Olaizolak, aurreko asteburuko garaipenari: 13-22 galdu zuen Urrutikoetxearekin, Artola eta Imazen kontra, Binakako Txapelketa Nagusian.
Profesionaletatik kanpo, berriz, asteburu ona izan da, esku pelotari hernaniarrentzat. Izan ere, frontoiko Gipuzkoako Txapelketan emaitza onak ez lortu arren, primeran aritu dira, bai trinketean, eta baita txapelketa pribatuetan ere. Guztira, 16 partidu irabazi, eta 11 galdu.
Baztango Txapelketan, esaterako, semifinaletara sailkatu dira lau hernaniar: infantiletan Aiur Elizazu, Garaikoetxea nafarrarekin, eta Auritz Txintxurreta eta Oier Azpeitia; eta kadete mailan Jon Jara, Eskuza arabarrarekin. Asteburu honetan jokatuko dituzte.
Trinketean, berriz, primeran ekin diote Unai Alvarez, Xabat Pagola eta Endika Arizmendi nagusiek, Oinatz Insausti eta Aimar Mujika jubenilek, eta Jon Jara kadeteak, aurreneko partidua irabazita. Mikel Lasak soilik galdu zuen, Insaustiren kontra aritu baitzen.
Asteburuko porrota gogorrenak, izan dira Unax Arabaolazak eta Unax Manterola kadeteek jasotakoa, eta Apaolaza eta Lasa seniorrena. Bi bikoteek, galdu egin zuten Gipuzkoako Txapelketaren ligaxkako azkeneko partidua, eta horrekin, txapelketatik kanpo geratu dira.
Astigartarren artean, berriz, irabazi egin zuen Eñaut Lizeaga jubenilak, buruz buru, ligaxkako bigarren partidua ere. Kadete mailan, berriz, galdu egin zuten Aner Urdangarinek eta Asier Saralegik, binaka; eta baita Saralegik berak ere, banaka.
Finaletik kanpo, Alaitz Barrenetxea eta Maddi Iriondo
Palistek, berriz, partidu gutxi izan dituzte asteburuan, baina garrantzitsuak. Semifinala zeukaten Alaitz Barrenetxeak eta Maddi Iriondok, jubeniletan; eta 14-30 galdu zuten, Intxurreren kontra. Bi urte helduagoak ziren kontrarioak, eta indarrean nabaritu zen hori. Ez, ordea, jokoan: hernaniarrak hobeto aritu ziren, baina indarrak erabaki zuen finalerako pasea.
Nagusien lehenengo mailan, 30-29 irabazi zuten Amaia Irazustabarrenak, Ariane Arrietak eta Maider Huizik; eta partidu guztiak irabazita, finalean izango dira. Bigarren mailako finalean ariko dira Ekhine Balerdi eta Garazi Urdangarin.