Kontrario zuzenak izan dituzte aurrez aurre, asteburu honetan, Hernaniko eta Mundarroko talde nagusiek. Eta garaipen garrantzitsuak lortu dituzte hernaniarrek: 3-1 nagusitu ziren Euskal Ligako neskak, etxean, Aurrera de Vitoriaren kontra; eta 1-3 irabazi zuten Ohorezko Erregional mailako mutilek, Zumarragan, Urolaren kontra.
Zubipen hiru puntuak lortuta, Euskal Ligako zortzigarren postura igo da Hernani, Aurrera de Vitoria bera atzeratuta, eta jaitsiera postuekin tartea haundituta. Ohorezko Erregionaletan, berriz, hirugarren daude txuri-berdeak, eta puntu bakarrera dute Anaitasuna bigarrena. Mikel Lizarazuren bi golek eta Harriren beste batek, goiko postuen borrokan bete-betean mantendu dute taldea.
Mundarrok berdindu, etxean
Garaipenik gabe geratu zen, ordea, Mundarro, Erregional Preferenteetan. Axular zeukan aurrean, hiru puntu gehiagorekin zegoena; eta ezin izan zuten sailkapenean harrapatu: 1-1 berdindu zuten Zarkumendegin. Hasi eta berehala aurreratu zen talde donostiarra, hirugarren minutuan; baina ez zuten etsi moreek, eta erritmo altua jarri zioten partiduari, berdinketaren bila. Izan zituzten aukerak, aurreneko zatian; baina ez zuten gola egiten asmatu.
Bigarren zatian lortu zuten hori, baina soilik 15 minutu falta zirenean. Ordura arte, behin eta berriro saiatu ziren; eta Ivanen golaren ondoren, garaipenarena ere bilatu zuten, baina ezin izan zuten lortu.