Euskeraren Eguna da gaur, abenduaren 3a; eta Urumea bailara osora zabalduko dira ospakizunak. Bereziki, eskoletara. Izan ere, urtero bezala, egun berezia izango da eskola guztietan, Euskeraren Egunerako propio prestatutako ekintzekin. Hala ere, Astigarragan antolatu dira ekintzak.
Astigarragako Herri Eskolan, erromeria izango dute ikasle eta irakasleek arratsaldean. Lehen Hezkuntzakoak areto nagusian elkartuko dira Gorka, Xabier eta Ibonen eskutik. Lehen, bigarren eta hirugarren mailakoak 14:45etatik 15:15etara eta lau, bost eta seigarren mailakoak 15:30etatik 16:00etara. Txikienak, Haur Hezkuntzakoak, Idoia Zabaletarekin patio txikian elkartuko dira.
Herri Eskolako 5 eta 6 mailakoek «100 da 100 berrehun ordu euskaraz» egitasmoa bideratuko dute astean zehar eta partehartzaileek paparrean txapa bereizgarri bat eramango dute.
Astigarragan eskertza 'ahotsak.eus' proiektuko partaideei
Astigarragako herrian ere antolatu dituzte ekintzak eta nabarmentzekoa da 17:30etan 'ahotsak.eus' proiektuko partaideei egingo zaien aitortza udaletxean. Bestetik, Gaztelekuan arratsaldean zehar emotikonoen jolasa antolatu da eta Xaguxarrekin haurrentzako jolasak egongo dira eskolako patioan 16:30etatik 18:00etara.
Kultur etxean antzerkia ere egongo da. 19:30etan, Mirari Martiarena eta Idoia Torregarairen Bakean dagoena bakean utzi antzezlana hasiko da eta sarrera 3 euro dira. Ereñotzuko Txirrita eskolan, berriz, arratsaldean elkartuko dira ikasle, irakasle eta gurasoak, frontoian, eta joko eta tailerrak, zein musika eta dantza izango dituzte.
Goizuetan ere egingo dute euskeraren inguruan ekitaldia. Egun guztian zehar plazan musika egongo da jarrita euskal abestiekin.
Elizatxo ikastolan, egun osoko egitaraua
Hernanin, joan den astean hasi ziren jolas garaian euskera indartzeko jolasak egiten, Elizatxon; eta egun osoko egitaraua prestatu dute gaur. Goizetik haur eta lehen hezkuntzako ikasleek idatzi dituzten leloak eta aterkia jarriko dituzte.
Euskerazko irakurketa saioa egingo dute Langilen, berriz; abestiak, hizkuntzarekin lotutako jolasak... izango dituzte. Herri kirolak izango dira DBHkoen gaia Inmaculadan, eta Txundi gaitzazu! ikuskizuna eskainiko dute LH eta HHkoek. Eta Urumean, abesti, dantza eta olerki emanaldia egin zuten atzo.
Hernaniko udal egutegian, jai
Bestalde, Hernaniko Udalak jakinarazi du, abenduaren 3a jaieguna dela udal egutegian. Hori horrela, itxita egongo dira udal eraikin gehienak, gaur: udaletxea, Udal Euskaltegia, Biteri eta liburutegia, esaterako. Kiroldegia 08:30etatik 13:30etara zabalduko dute. Eta ohiko ordutegia izango du Musika Eskolak.
Egitaraua
ELIZATXO IKASTOLA
09:30: LHko ikasleek idatzi dituzten leloak eta aterkia jarriko dituzte ikastolako frontoian.
HHkoek, euri ttanttak jarriko dituzte frontoian. Euri ttanttetan, haur bakoitzak eta bere familiak, gehien gustatzen zaien euskerazko hitza idatzita edukiko dute.
Ikasleek idatzi dituzten euskerazko hitzak bozkatu ahal izango dira. Gehien bozkatua den hitza, ikastetxeko web orrian argitaratuko da.
09:30-10:30: LHko euskerazko irakurketa saioa egingo dute, bakoitzak bere gelan.
10:30: LHko ikasleak HHko ikasleen geletara joango dira abestia abestera eta HHko ikasleek ere abesti bat abestuko diete dagokion taldeari. Ondoren hamaiketakoa egingo dute bi taldeak elkarrekin.
11:30: Patioan elkartuko dira denak zenbait dantza dantzatu eta abesteko. Kokapena: Ikasturte amaierako jaialdian izaten den bezalakoa.
HHko ikasleek Oihu bat entzun da eta Ahoa bizi, belarriak prest. LHko ikasleek Emaiozu bostekoa.
14:30: LH 1, 2 eta 3ko ikasleek abesti emanaldia eskainiko dute aniztasun gelan.
15:15: LH 4, 5 eta 6ko ikasleek abesti emanaldia eskainiko dute aniztasun gelan. Abestuko diren abestiak Ahoa bizi, belarriak prest; Behin Betiko; Lau Teilatu Gainean; Bertsoak; Lasai, lasai; Euskal Herrian Euskaraz.
LANGILE IKASTOLA
LHko guztiek batera emango diote hasiera egunari Euskal Herrian Euskaraz kanta abestuz. 50garren urteurrena dela eta erronka ezberdinak proposatu dituzte: hitz kuttunak, euskalkiak eta sinonimoak, euskal musika...
Haur Hezkuntzan gurasoekin egingo da hizkuntzarekin jolasteko dituzten altxorren bilduma. Hau da, ezagutzeko ditun esaera zaharrak, aho-korapilo eta abar.
INMACULADA IKASTETXEA
DBH: Aurten herri kiroletan zentratuko dira ospakizunak. Goizean hauen jatorria landuko da klaseetan eta arratsaldean herri kirol ginkana egingo da eskolako patioan.
LH eta HH: Goizean muralak, aurpegi margoketa, mahai jolasak, karaokea... egingo dira. Arratsaldean Txundi Gaitzazu! ikuskizuna egingo da eskolako aretoan.
TXIRRITA ESKOLA
Arratsaldean gurasoekin batera frontoian elkartu eta joku tailerrak izango dira musikaz girotuta eta dantzatzeko asmoarekin.
ASTIGARRAGA
Eskolan: 14:45-16:00: LHkoek erromeria Gorka, Xabier eta Ibonen eskutik. Hau Hezkuntzakoak patio txikian. 5 eta 6 mailakoek 100 da 100 berrehun ordu euskaraz egitasmoa bideratuko dute astean zehar eta parte-hartzaileek paparrean txapa bereizgarri bat eramango dute.
Herrian: 17:30: «ahotsak.eus» proiektuko partaideei eskertza udaletxean.
16:30-18:00: Xaguxarrekin haurrentzako jolasak eskolako patioan.
Gaztelekuan arratsaldean zehar emotikonoen jolasa.
19:30: Antzerkia kultur etxean Bakean dagoena bakean utzi (3 euro). Mirari Martiarena eta Idoia Torregarai.
