Zaila zeukan Asier Azpiroz zubietarrak, Gipuzkoako Bertsolari Txapelketaren finalera pasea lortzeko. Bere finalaurrekoan 463 puntu lortuta zen, Hernaniko Iraulio Panttalone Bertso Kabiyaren ordezkaria; eta behar zuen atzo, Tolosako azkeneko finalaurrekoan, soilik bi lagunek lortzea, gehienez ere, berak baino puntu gehiago. Hiru izan ziren, ordea, eta bederatzigarren postu mikatzarekin agurtu da.
Jon Maiak irabazi zuen atzo, 494,5 punturekin; bigarren izan zen Oihana Iguaran, 471rekin; eta hirugarren Beñat Lizaso, 469,5rekin. Jokin Urangak 456,5 lortu zituen, Iban Urdangarinek 444, eta Haritz Mujikak 432.
Hori horrela, Agin Laburu eta Beñat Gaztelumendi izango dira Hernaniko bertso eskolako ordezkariak, bi puntuazio altuenak lortuta. Eta haiekin batera, honakoak: Jon Maia, Alaia Martin, Ane Labaka, Oihana Iguaran, Beñat Lizaso eta Nerea Elustondo. Donostiako Ilunben izango da finala, abenduaren 14an. Sarrerak, dagoeneko salgai: bertsosarrerak.eus.