Euskeraren Eguna da bihar, abenduaren 3a; eta Urumea bailara osora zabalduko dira ospakizunak. Bereziki, eskoletara.
Izan ere, urtero bezala, egun berezia izango da eskola guztietan, Euskeraren Egunerako propio prestatutako ekintzekin. Hernanin, joan den astean hasi ziren jolas garaian euskera indartzeko jolasak egiten, Elizatxon; eta egun osoko egitaraua prestatu dute gaur. Langilen, berriz, abestiak, hizkuntzarekin lotutako jolasak... izango dituzte. Herri kirolak izango dira DBHkoen gaia Inmaculadan, eta Txundi gaitzazu! ikuskizuna eskainiko dute LH eta HHkoek. Eta Urumean, abesti, dantza eta olerki emanaldia egingo dute.
Ereñotzuko Txirrita eskolan, berriz, arratsaldean elkartuko dira ikasle, irakasle eta gurasoak, frontoian, eta joko eta tailerrak, zein musika eta dantza izango dituzte. Eta Astigarragako Herri Eskolan, erromeria izango dute ikasle eta irakasleek arratsaldean, areto nagusian elkartuta.
Hernaniko udal egutegian, jai
Bestalde, Hernaniko Udalak jakinarazi du, abenduaren 3a jaieguna dela udal egutegian; eta aurten, abenduaren 2an ere jai dutela udal langile gehienek.
Hori horrela, itxita egongo dira udal eraikin gehienak, gaur eta bihar: udaletxea, Udal Euskaltegia, Biteri eta liburutegia, esaterako.
Kiroldegiak ohiko ordutegia izango du gaur, eta 08:30etatik 13:30etara zabalduko dute bihar. Gaztelekua, berriz, gaur bakarrik egongo da itxita, ohi bezala. Eta ohiko ordutegia izango du Hernani Musika Eskolak ere, bi egunetan.