Astelehenean bukatu zen aurtengo Sagardo Foruma, Donostiako Kursaalean; eta bertan banatu zituzten, Nazioarteko Sagardo Lehiaketaren sariak, bederatzi kategoriatan.
Euskal Herrian ekoiztutako sagardoen artean, Zapiainek eskuratu zuen onenaren saria; eta makina bat domina lortu zituzten, Urumea bailarako sagardotegiek. Astigartarren artean, Zapiainek hiru urre, Alorreneak bi urre, Petritegik urre bat, Gurutzetak bi zilar, eta Gartziategik zilar bat eta brontze bat.
Eta hernaniarren artean, urre bat eta zilar bat eskuratu zituen Zelaiak.
Egoitz Zapiain astigartarrak ere eskuratu zuen zilarrezko domina, Paul Vander estatubatuarrarekin batera egin duen sagardo batekin. Baina haiek, sari potoloagoa ere jaso zuten: Best of show (ekitaldiko onena) izendatu zuten, beraiek aurkeztutako Maiti fresh sagardoa, euskal-estatubatuar zaporekoa, bereziena izategatik.
Gainerako kategorien artean, beste sari nagusi bat ere jaso zuen Zapiain sagardotegiak: izotzezko sagardo onena izendatu zuten Bizi-Goxo 2015.
190 sagardo aurkeztu ziren guztira lehiaketara, eta sariak banatzeko, mundu osoko dastatzaile ospetsuek dastatu zituzten. 140 domina banatu zituzten guztira: urrezko 47, zilarrezko 62, eta brontzezko 31. Ohorezko bi sari ere eman zizkieten, kategoriatik kanpo, Sidra Panizales eta Roxmut sagardotegi asturiarrei.