Pelota bizi-bizi egon da asteburu honetan Urumea Bailaran. Ostiraletik hasita, indarrarekin eman diote pelotari, bai eskuz, baita palaz ere.
Hain zuzen, azken hau izan da protagonista egunotan. Gipuzkoako Txapelketa jokatu zuten palaz, Aiheko Zubimendi eta Endika Ramos hernaniarrek, eta partidu estu bezain zirraragarriaren ondoren, txapela janztea lortu zuten.
Hain zuzen, Aizpuru eta Daguerrek osatutako zarauztar bikotea izan zuten aurrez aurre Altzako frontoian, eta 24-25 irabazita, estu-estu, irabazi zieten.
Haiek azaldu dutenaren arabera, «partidu osoan zehar aurretik joan gara. 6 tanto aurretik ere joan gara, baina azkenean, partidua gogortu egin da... baina, txapelak Hernanira!».
Asteburu gazia,hernaniarrek
Esku pelotan, aldiz, asteburu zaila izan dute hernaniarrek. Jokatu dituzten partiduetatik, 20 porrot, eta 7 garaipen izan baitituzte.
Emaitza garrantzitsuena Gipuzkoako Binakako txapelketan izan dute Anartz Oiartzabal eta Oinatz Insausti hernaniarrek. Nahiz eta partidua galdu, aurreko emaitzei esker finalerdietarako sailkatuak izan dira, jardunaldi baten faltan.
Era berean, nabarmentzekoa da Julen Deskarga eta Oier Alegriaren garaipena. Kasu honetan, jardunaldi baten faltan, oraindik badaukate aukera sailkatzeko.
Banakako txapelketan hasiera, astigartarrek
Astigartarrak, aldiz, ostiralean estreinatu ziren Gipuzkoako Banakako txapelketan. Nagusien mailan, Eñaut Lizeagak Intxurreko Uzkudun 22-8 garaitu zuen ostiralean, Astigarragan; eta Jokin Santxezek, jarraian, Hernaniko Labakaren aurka ere, irabazi egin zuen, 22-17.
Larunbatean, Oier Gurutzealderen txanda izan zen. Harri Loidiren ordezko gisa jokatu zuen Errenterian, Epleko Gelisen kontra. Berak, ordea, galdu egin zuen. 22-5 garaitu zuen Eple taldeko kideak. Aurkari zaila izan zuen aurrean, baina, hala ere, dena ematen saiatu zen.