Hileko azkeneko asteartero bezala, gaur egingo dute Plenoa, ohiko deialdian, Hernaniko eta Astigarragako Udalek. Arratsaldeko 19:00etan izango dira biak, eta gai bat badute komunean: azaroaren 25aren bueltan, adierazpen instituzionala landuko dute Astigarragan, indarkeria matxistaren kontra «konpromiso zehatzak» hartzeko, EH Bilduk aurkeztuta; eta ekintza berezia egingo dute Hernaniko emakumezko udal hautetsiek. Joan den ostiralean adostu zuten adierazpen instituzionala, Hernanin udal taldeek, Bozeramaileen Batzordean.
Horrela, adierazpenetan, bi Udalek bere egingo dute Emakumeen Munduko Martxak bultzatutako indarkeria matxistaren aurreko erantzun-protokoloa; neska gazteei eta emakume helduei zuzendutako jabetze eskolak antolatzen hasiko dira edo jarraituko dute; edota nerabeei eta gazteei zuzendutako sentsibilizazio eta formazio jarduera iraunkorrak jarriko dituzte martxan. Astigarragan aurkeztuko den mozioak, gainera, jasotzen du protokolo bat eratuko duela Udalak, eraso matxisten aurrean erantzuteko; eta hori modu egokian aplikatzeko neurriak hartu eta koordinaziorako egiturako indartuko dituela. Plenoan bertan aurkeztuko dute protokolo hori.
Hiribus zerbitzuaren azterketa egiteko hitzarmena, Hernanin
Hernaniko Plenoan, beste bederatzi puntu izango dituzte eztabaidatzeko. Horien artean dago, besteak beste, Udalaren eta Gipuzkoako Garraio Agintaritzaren arteko hitzarmena, Hiribus zerbitzuaren inguruko azterketa egiteko. 2020ko taxi tarifa berriak onartzea ere bozkatuko dute Plenoan, Berriak merkatari eta ostalarien elkarteari ematen zaion zuzeneko dirulaguntzan aldaketa egitea.
Horien aurretik, emango dute kontuhartzailearen txostenen berri: 2019ko udal aurrekontuaren exekuzioari buruzko informazioa; aurrekontu eta finantza iraunkortasunaren helburuak betetzeari buruzkoa; barne kontrolaren emaitzaren txostena; eta kontuhartzailearen eragozpen oharra.
2020ko zerga ordenantzak eztabaidagai, Astigarragan Indarkeria matxistaren inguruko mozioaz eta protokoloaz gain, beste hamar puntu ere izango ditu, Astigarragako Plenoak. Horrela, esaterako, eztabaidatuko dituzte 2020 urterako zerga ordenantzak; eta landuko dituzte alokairu sozialeko etxebizitzen zozketarako oinarriak.
Astigarraga-Hernani eskola kirolaren ereduaz ere ariko dira, eta beste hiru mozio aurkeztuko ditu EH Bilduk: Haur eta Nerabeen Eskubideak Aldarrikatzeko Nazioarteko Egunaren ingurukoa bat; Euskararen Egunaren ingurukoa bestea; eta Boliviako estatu kolpea salatzeko mozioa, hirugarrena.