Aldarrikapenez bete zen Urumea bailara atzo, azaroaren 25ean, Emakumeenganako Indarkeriaren Aurkako Egunean. Kontzentrazioak egin zituzten, Astigarragan eguerdian eta Hernanin iluntzean, eta Kalejira Morea abiatu zen Goizuetan, arratsaldean. Ozen adierazi zuten, «elkar ezagutu, boteretu eta armaz jantzi» behar dutela, «baztertzen, gutxiesten, erasotzen eta akabatzen gaituen sistema honen aurrean».
Eta atzokoei segida emanez, gaur eginen dute azkeneko aldarrikapena, emakume aranoarrek. Maisuenean jarri dute hitzordua, iluntzeko 20:00etan; eta elkarrekin afalduko dute, bakoitzak etxetik zerbait eramanda. Eta afaldu ondoren, pelikula bat ikusiko dute, bertan.
Azaroaren 25aren bueltako azkeneko ekintza, hala ere, Goizuetan eginen dute. Amonaren istorioak emanaldia eskainiko du Amaia Elizagoien Varelak, datorren igandean, eguerdiko 12:00etan eskolako jangelan.