Emakumeenganako Indarkeriaren Aurkako Nazioarteko eguna da gaur, Azaroak 25, eta Urumea bailaran hainbat ekitaldi antolatu dira, eguna gogorarazi eta emakumeek aske eta beldurrik gabe bizitzeko duten eskubidea aldarrikatzeko. Ekitaldiak asteburuan hasi dira, eta bihar ere jarraipena izango dute.
Goizuetan eta Hernanin kalera, arratsaldez
Herri Babesarearen aurreneko foro ibiltaria lehengo asteazkenean iritsi zen Hernanira, eta bertan giza-eskubideak izan zituzten hizpide hainbat txokotatik etorritako aktibistek. Azaroaren 25a izan zuten gogoan, eta gaurko ere egin da deialdia. Hernaniko Koordinadora Feministak deituta, manifestazioa egingo da, 19:00etan Plazan Berritik aterata.
Goizuetan ere gaurko jarri dute hitzordua. Goizean goizetik prenda more bat soinean ateratzeko dei egin dute, eta arratsaldeko 17:30etarako Kalejira Morea deitu dute. Globo moreak bildu eta argazkia aterako da.
Astigarragan, bestalde, larunbatean egin zieten omenaldia 2019an erail diren 98 emakumeei. Biharko Plenoan, berriz, adierazpen instituzionalak egingo dituzte, bai Astigarraga eta baita Hernaniko Udalek ere.
Aranon bihar, afari eta guzti
Gehiago ere izango da datozen egunetan. Aranon, bihar Maisuenean 20:00etan jarri dute hitzordua, pelikula bat ikusi eta etxetik ekarritakoarekin elkarrekin afaltzeko. Bestalde, igandean Goizuetan Amonaren istorioak emanaldia izango da.