Etzi, astelehenarekin, izanen da azaroaren 25a, Emakumeenganako Indarkeriaren Aurkako Nazioarteko Eguna. Eta aldarrikapenekin bat egiteko, Kalejira Morea antolatu dute Goizuetan, astelehenean bertan.
Goizean goizetik prenda more bat janzteko deialdia luzatu dute; eta kalejirarako hitzordua jarri dute, arratsaldean. Plazan elkartuko dira, 17:30etan; eta bertatik abiatuta, herrian barrena ibiliko dira, globo moreak bilduz. Bukaeran, taldeko argazkia aterako dute, Plazan.
Datorren iganderako, berriz, Amonaren istorioak emanaldia antolatu du Gizarte Zerbitzuen Mankomunitateak, Goizuetan. Amaia Elizagoien Varelak eskainiko du, eguerdiko 12:00etan hasita, Xalto eskolako jangelan.
Horrez gain, azaroaren 25ari lotutako ekintza gehiago antolatu dituzte, Leitzan. Gaur bertan, hitzaldia izanen da Atekabeltzen, 12:00etan: Landa eremuko emakumeak indarkeriari aurre egiten; Colombiako elikadura burujabetzaren aldeko emakumeen bizipenak, Maria del Socorro Pisso Mazabuelen eskutik. Eta bihar, egun osoan zehar izanen dira ekintzak: poteo feminista, emakumeen bazkaria, Mito, izaki eta kondaira ipuin kontaketa, eta Maria Riveroren kontzertua.