Ezin partidu zailagoak izango dituzte asteburu honetan, Hernani eta Mundarroko mutilen talde nagusiek; baina etxean ariko dira, behintzat. Aurreneko bi sailkatuen kontra jokatuko dute, gaur arratsaldean.
Take liderra hartuko dute moreek, Astigarragako kiroldegian, arratsaldeko 18:00etan; eta aurreneko sailkatua izanda ere, beldurrik ez dute izango, eta motibazioa bai, soberan. Izan ere, bolada onean dira astigartarrak, azkeneko bi partiduak irabazita, eta gora egiten ari dira sailkapenean; zortzigarren daude orain.
Kontrako ibilbidea daramakite hernaniarrek, azkeneko hiru partiduak galdu baitituzte. Baina aukera ona dute gaurkoa, garaipena lortu eta konfiantza berreskuratzeko. Santo Tomas Lizeoa hartuko dute kiroldegian, bigarren sailkatua, arratsaldeko 18:00etan hasita.
Aldiz, etxetik kanpo ariko da Mundarroko nesken taldea. Irunen jokatuko dute, Azken Portu kiroldegian, Erroibideren kontra. Arratsaldeko 16:00etan izango da. Liga hasiera bikaina izan dute astigartarrek, bostetik bost irabazita, eta segida eman nahi diote, zazpigarren sailkatuaren kantxan: hiru irabazi eta bi galdu dituzte.