Konpromiso zailak zein puntuak pilatzeko aukera onak, denetik izango dute bailarako futbol taldeek, asteburu honetan. Talde nagusien artean, Hernaniko Ohorezko Erregional mailako mutilak dira, etxean jokatuko dutenak. Mondragon hartuko dute Zubipen, gaur arratsaldeko 16:30etan hasita. Joan den asteburuan partidu garrantzitsua irabazi ondoren, sailkapenaren beheko aldean talde bat izango dute kontrario gaur, aurreneko postuetan jarraitzeko.
Konpromiso zailagoa izango dute, nabarmen, neska txuri-berdeek. Zubietan jokatuko dute gaur, arratsaldeko 16:00etan, Realaren bigarren taldearen kontra. Euskal Ligako lider dira txuri-urdinak, jokatu dituzten 10 partiduak irabazita. Hernanik, berriz, sailkapenaren erdi parean jarraitzen du, aurreko asteburuan galduta ere; eta punturen bat eskuratzeko asmoz joango da, zelai zailera.
Eta etxetik kanpo ariko da Mundarro ere, mutilen Erregional Preferenteen mailan. Ez dute partidu erraza izango, haiek ere: Donostian jokatuko dute gaur, San Jose Obreron, Dunboa Eguzkiren kontra. Arratsaldeko 17:30etan hasiko da partidua. Seigarren daude donostiarrak, 18 punturekin; moreek baino bost puntu gehiago. Bederatzigarren dira astigartarrak.
Beheko postuetatik ateratzeko etxean, Hernaniko jubenilak
Etxean jokatuko dute, bestalde, Hernaniko jubenilek, Liga Nazionaleko partidua. Beheko postuetatik ateratzea dute erronka, eta Getxoren kontra jokatuko dute, horretarako puntuen bila, gaur arratsaldeko 18:30etan.
Bederatzi punturekin, azkenaurreko postuan daude txuri-berdeak. Irabazi beharra daukate gaur, erdi parean dabilen talde bizkaitarraren kontra.