Musikarientzat berezia izaten da Santa Zezilia eta azaroaren 22a, gaurko eguna, da beraien patroiaren egun haundia. Kontzertu batzuk izan dira, eta gehiago emango dira gaur eta asteburuan. Atzo arratsaldean, Astigarragako Norberto Almandoz Musika Eskolako eta Hernaniko Musika Eskolako ikasleek Musikalean ekimenean hartu zuten parte. Kalejiran bakoitza bere herrian zehar. Astigarragan kontzertua ere eskaini zuten udaletxeko arkupetan, abesbatzak eta pandero-joleek, eta Gabiltzanian eta Deblauki taldeek.
Hernaniko ikasleek, kontzertua gaur emango dute, 18:30etan Biterin. Gaur ere Kantuz eta Aiztondo, Hernani eta Astigarragako abesbatzek elkarrekin kantatuko dute, 20:00etan Hernaniko Milagrosan, eta Goiz Eguzki abesbatza kalean ibiliko da 19:00etatik aurrera.
Asteburuan, saio gehiago
Bihar, larunbata, 20:15etan Andoaingo Gurutze Santuko ermitan izango dira Ozenki eta Doinu Zale. Igandean, etzi, berriz, Hernaniko Goizetik Txistulari Taldeak diana berezia egingo du 09:15etan, tronpeta-joleekin, eta Astigarragako Txirriskla eta musika eskolako txistulariak elkarrekin ariko dira 13:00etan, Joseba Barandiaran Plazan. Patroiak merezi du horrenbeste kontzertu.