Milaka lagunek egin zuten bat larunbatean, Araba, Bizkaia, Gipuzkoa eta Nafarroako hiriburuetan pentsiodunek deitutako mobilizazioetan. Hernaniko Sortuk eta Hernaniko Koordinadora Feministak ere bai, besteak beste.
Gipuzkoarrak Donostian bildu ziren. Bertan, «pentsio publikoen lege bat» aldarrikatu zuten, beste behin. «Diputatuen Kongresuan onartua izatea nahi dugu, pentsioak bideragarriak izan daitezen, gutxienez KPIaren arabera eguneratuak, eta gutxieneko pentsioa 1.080 eurokoa izatea. Hau da, murrizketa lege guztiak indargabetzea». Era berean, «haserrea» adierazi nahi izan zuten, «%0,25eko errebalorizatze legearen aurka eta agindutako %0,9ko igoeraren aurka, ez baitu benetako inflazioa estaltzen, eta, gainera, gehienez urtebeterako denez, albo batera uzten baititu pentsio apalenak».
Bestalde, gehitu zuten «Estatuak ez diola aurre egin nahi Gizarte Segurantzaren defizitari», eta horregatik, eskaera guztiak Gasteiz eta Iruñeko parlamentuetan aurkeztuko dituztela, Diputatuen Kongresura bideratu ditzaten, eta, «pentsio publikoen osagarri bat jar dezaten».
Larunbateko hitzorduak pasata ere, atzo berriro elkartu ziren pentsiodunak Hernanin. «Mugimenduaren sendotasunarekin harro» agertu ziren, «22 hilabete kalean pasa ondoren, larunbatean milaka lagun atera ginelako kalera (...) eta bai baitakigu zein zaila den hainbeste denboran mugimendu sozial bat mantentzea». Era berean, itxaropentsu agertu ziren, hauteskundeen ondoren, Gobernu akordioa egon litekeelako.