Ostirala izango dute egun haundia musikariek: Santa Zezilia eguna, musikarien patroiarena. Kontzertu batzuk izan dira, eta gehiago emango dira.
Musikalean, bezperan
Ostegunean, Astigarragako Norberto Almandoz Musika Eskolako eta Hernaniko Musika Eskolako ikasleek Musikalean ekimenean hartuko dute parte.
Hernanin, 17:30etan egingo dute kalejira. Astigarragan, 18:15etan, eta 19:00etan kontzertuak emango dituzte udaletxeko arkupetan, abesbatzak eta pandero-joleek, eta Gabiltzanian eta Deblauki taldeek. Hernaniko ikasleek, kontzertua ostiralean emango dute, 18:30etan Biterin.
Asteburuan, gehiago
Kantuz eta Aiztondo, Hernani eta Astigarragako abesbatzek elkarrekin kantatuko dute ostiralean, 20:00etan Hernaniko Milagrosan, eta Goiz Eguzki abesbatza kalean ibiliko da 19:00etan. Larunbatean, 20:15etan Andoaingo Gurutze Santuko ermitan izango dira Ozenki eta Doinu Zale.
Igandean, berriz, Hernaniko Goizetik Txistulari Taldeak diana berezia egingo du 09:15etan, tronpeta-joleekin, eta Astigarragako Txirriskla eta musika eskolako txistulariak elkarrekin ariko dira 13:00etan, JBn.