2019ko programaren barruan, Elkarbizi taldeak Auzokidetza suspertu elkarbizitza berregiteko gogoeta prozesua jarri zuen martxan uztaila eta urria bitartean, bazkide eta laguntzaileen artean. Orain, prozesu horri bukaera emateko, ikastaro irekia antolatu du, larunbaterako.
Elkarbizitza, auzokidetzatik
Saio honetan Juan Goikoetxeak egingo du prozesu honetan guztian zehar garatu diren edukien azalpena. Lasarte-Oriako Villa Mirentxu udal eraikineko areto nagusian egingo da, goizeko 11:00etatik aurrera.
Elkarbizi taldetik azaldu dutenaren arabera, «gogoeta prozesuaren eta ikastaroaren helburua da auzo-elkarbizitzari egindako kalterik haundiena gertatu den esparruetan lan egitearen garrantzia azpimarratzea. Gure historian zehar, auzokidetzaren eskutik sortu ziren gizarte-erakunde inportanteenak, auzotar guztien arduraz sostengatzen zirenak, nor-bakoitza eta giza-elkarte osoaren mesederako. Auzolanaren tradizioak eragin dezakeen etorkizunaren arabera, lor dezakegu gure gizartea bere buruaz jabeagoa, ekintzaileagoa eta kooperatiboagoa izatea. Horrela, segurtatu daiteke elkarbizitza sostengarriago bat, bizikide direnentzat kalitatezko giza-bizitza eta elkarrekikotasuna bermatuko dituena».
Irekia, baina izena emanda
Saioa edonori irekia izango dela nabarmendu dute, baina «ikastaroaren izaera trinkoa» medio, bi saio egingo direla. Dena den, izena eman behar da parte hartzeko, bai ikastaroan, eta baita tartean egingo den bazkarian ere. Osteguna da horretarako azken eguna. Emailez egin behar da: ganboiturri@gmail.com.