Iaz jarri zuten martxan 65 urtetik gorako adinekoei zuzendutako Jubiloteka Zerbitzua, Arano, Goizueta, Areso eta Leitzan. Herri horietako Gizarte Zerbitzuetako Mankomunitateak ematen duen zerbitzua da. Aurten, dinamizatzailea bilatu beharra zegoela-eta, atzeratu egin da zerbitzuaren hasiera, baina aste honetan bertan jarri da martxan.
Orain, Olaia Salaberria ibiltzen da herriz herri, saioak dinamizatzen. Aurreneko aste honetan, «elkar ezagutzen» eta «martxa hartzen» ari direla aitortzen du, eta pixkanaka, saioak «egokitzen» joanen dela. Zalantzarik gabe azpimarratzen duena da «parte hartzera animatu» nahi dituela adinekoak, «aukera aprobetxatzera».
Herri txikietako hutsuneak betetzen
Salaberriak azaldu du Mankomunitateak ematen duen zerbitzua dela, Jubiloteka. «Herri handietan izaten dira eguneko zentroak, zaharren egoitzak... Aukera gehiago izaten dute adinekoek elkartzeko. Baina herri txikietan ez. Etxez etxeko zerbitzua bakarrik izaten da. Jubilotekarekin, berriz, asmoa da beraiek harremanetan jartzeko zerbitzua ematea». Lehengo urtean jarri zen martxan aurrenekoz, eta jarraipena eman zaio aurten ere.
Denetatik egiten dute saioetan: memoria lantzeko ariketak, gimnasia pixka bat, tertulia, ipuin eta antzerkiak landu... «Zerbitzua aurreko urtean hasi zen ematen. Aste honetan hasi gara berriro, eta iaz aritu ziren batzuk animatu dira, baina berriak ere bai, eta ni ere lehendabizikoz ari naiz. Beraz, elkar ezagutzen ari gara oraindik, martxa hartzen». Hori horrela, zerbait prestatuta eraman du Salaberriak aurreneko saioetara, baina guztia egokitzeko prest dagoela azaldu du. «Programazio batekin abiatu naiz, baina gustatuko litzaidake saioak beraien gustokoak izatea, beraien zaletasunetatik abiatzea. Kosta egiten zaie hasieran, suelto aritzea. Baina bakoitza ezagutzen joanen naiz pixkanaka, eta asmoa da horren arabera aldatzea, egokitzea».
Astean behin, eta konpromisorik gabe
Herri bakoitzean astean behin izaten da Jubiloteka Zerbitzuaz gozatzeko aukera. Leitzan astelehenetan biltzen dira; Areson, asteazkenetan. Goizuetan, berriz, asteartetan, jubilatuen elkartean, eta Aranon, ostegunetan, Maisuenean. Denetan, hiru orduko saioak ematen dira, goizeko 10:00etan hasi eta eguerdiko 13:00ak arte.
«Leitzan oraingoz elkartu gara 11 lagun. Goizuetan, 8. Areso eta Aranon izanen dira lauzpabost», azaldu du dinamizatzaileak. «Hasi diren gehienak dira aurreko urtean ibilitakoak. Baina urtean zehar ere aukera izanen da nahi denean hasteko. Ez dago kopuru mugarik, eta ikasturte osoan aritzea ere ez da derrigorrezkoa».
Probatu nahi duen guztiari irekita dago, beraz, Jubiloteka, eta inolako konpromisorik gabe hartu daiteke parte bertan.
Izena eman, edo gerturatu
Ateak zabalik badauzkate ere, komeni da izena ematea. Horretarako, Gizarte Zerbitzuetara jo behar da. Telefonoz deitu daiteke 948 510 840 zenbakira. Baina, era berean, saioren batera gerturatuta ere hasi daiteke. Bertan emanen dute behar den informazioa.
Zerbitzua ordaindu egiten da, baina «bakoitzaren pentsioaren arabera» egokitzen da prezioa. Gauzak horrela, 5 edo 10 euro artean ordaintzen da normalean, gehienez, hileko, eta doan ere jaso daiteke zerbitzua.
«Asmoa da adinekoek harremanetan jartzeko zerbitzua ematea»
Zerbitzu garrantzitsua
Abantailak besterik ez dizkio ikusten Olaia Salaberriak Jubilotekari, eta dei egin nahi izan du, adinekoak «parte hartzera animatu» daitezen, «aukera aprobetxatzera». Izan ere, Salaberriaren esanetan, «Herri hauetan, txikietan, garrantzitsua da zerbitzu hauei eustea. Zaila izaten da antolatzea, baina behin eginda, aprobetxatu egin behar da».
Gainera, iruditzen zaio adinekoei mesede egiten diela. «Ongi pasatzen dute, eta ez da behartuta egiten duten zerbait».
Adinean aurrera, osasuntsu
Adituen esanetan, urteak bete ahala, gure memoria oroitzapenetan finkatzen da gero eta gehiago. Hau da, gero eta helduago izan, orduan eta gehiago gogoratzen ditugu gazte garaiak, seme-alabak txikiak zireneko momentuak… Joera hori, gainera, hazi egiten da, gehitzen bazaio gero eta denbora gehiago pasatzen dela bakarrik, eta gero eta gutxiago izaten direla harremanak beste batzuekin. Eta horrela, memoria oroitzapenetan finkatuta geratzeko arriskua dago; iraganean gehiago bizitzera, orainean baino.
Horrexegatik, garrantzitsua izaten da burua lantzea, ariketa desberdinak eginez: atentzioa jartzeko ariketak, kontzentrazioa eskatzen dutenak, eginbeharren bat eskatzen dutenak… Beste hainbat ariketa ere onuragarriak izan daitezke: irakurtzea, karta jokoan aritzea, eskuak eta begiak elkarrekin lanean aritzea eskatzen dutenak (margotzea, jostea, buruhausteak egitea…).
Hori guztiaz gain, komenigarria izaten da ariketa fisiko pixka bat egitea, jende gehiagorekin harremanetan jartzea, taldean ekintza desberdinak egitea, lagun giroan ibiltzea…
Horretarako denetarako aukera ematen du Jubilotekak, eta Olaia Salaberria dinamizatzailea bera prest dago proposatzen diren ekintzak saioetan txertatzeko. Denen gustora egokituta aritzeko aukera izanda, nork ez du bada, aprobetxatuko?
JUBILOTEKA
Saioak: astean behin, goizeko 10:00etatik 13:00etara:
-Goizuetan, asteartetan, jubilatuen elkartean.
-Aranon, ostegunetan, Maisuenean.
Ekintzak: memoria lantzeko ariketak, gimnasia, antzerkia, ipuinak, tertulia...
Prezioa: pentsioen arabera egokitua. Hilean 5 eta 10 euro artekoa edo doan.
Izen-ematea: Gizarte Zerbitzuetan, 948 510 840 telefono zenbakira deituta, edo saio batera gerturatuta.
Konpromisoa: Norberak nahi duena. Astero edo noizean behin hartu daiteke parte saioetan, eta ikasturtean zehar, nahi denean hasi daiteke.