Hiru semifinal zeuzkaten jokoan asteburuan, Gipuzkoako Txapelketan, bailarako pelotariek. Eta guztiak irabazi dituzte, finalerako pasea lortzeko.
Ohorezko Mailako finala jokatuko dute, eskuz, Hodei Exposito astigartarrak eta Markel Lizeaga hernaniarrak. Semifinal estu bezain ederrean, 22-20 nagusitu ziren, Tartaloetxeko Azketa eta Elizegiren kontra. Datorren asteburuan izango dute finala, Lapkeko Zubizarreta eta Quinaren kontra.
Estu izan zuten finalerako pasea, Ekain eta Eñaut Lizeaga astigartarrek ere, jubenilen 1go mailan. 22-19 nagusitu ziren, Tolosako bikotearen kontra.
Eta tarte pixka bat gehiagorekin nagusitu ziren, Harri Loidi eta Jokin Santxez astigartarrak. 22-15 irabazi zioten Oiarpeko bikoteari, eta Añorgako Oliden eta Orbegozo izango dituzte kontrario, finalean.
Palaz, berriz, beste horrenbeste lortu zuten, Hernaniko bi taldek, mutil nagusietan. Bigarren mailan, 25-16 irabazi zuten Endika Ramosek eta Aiheko Zubimendik, Tolosan, partidu oso gogorrean. Semifinaletako joaneko partidua zen, eta bueltakoa jokatuko dute asteburu honetan, Hernanin. Eta hirugarren mailan, kostata irabazi zuten final laurdena, Mikel Manterolak eta Ander Arandiak ere, Danok Bat taldearen kontra (25-21).
Gainerakoan, berriz, emaitza ezberdinak lortu dituzte, pelotari hernaniarrek. Palaz, garaipena lortu zuten neska nagusiek, lehenengo zein bigarren mailan. Baina eskuz, asteburu txarra izan da, oro har.
Umore Onakoek,
etxeko aurkariak
Goizuetako Umore Ona Pilota Txapelketari dagokionez, bigarren jardunaldiko partiduak ostiralean jokatu zituzten, eta etxekoak etxekoen kontra aritu ziren hirutik bi partidutan.
Umeen mailan, Aranberritarrek irabazi zieten Seges eta Zurutuzari, 18-8, eta Larin eta Garmendiak Legarreta eta Alsuari, 18-16. Haurren mailan, berriz, Aurrera eta Larrungo pilotariak gainditu zituzten etxeko Legarreta eta Elizegik, 18-7.
Haurren mailako beste partiduan, Hernaniko Elizazu eta Iturbek ezin izan zuten Aurrera eta Larrungo bikotearen kontra; 9-18 galdu zuten. Gainontzean, kimuen mailan Oiarpe nagusitu zen Aurreraren kontra, 18-11, eta 22 urtez azpikoetan Larraun, Bergararen aurrean, 22-17.
Hurrengo partiduak ostiralean jokatuko dira