Asteburu gora-beheratsua izan da Hernaniko eskubaloi taldeentzat. Astigarragako Mundarroko neskak, berriz, fin ibili dira. Jubenilen taldeak irabazi egin dio Laubideri, 28 eta 34. Horrela, hirugarren postuan daude astigartarrak, 4 garaipen eta porrot bakarraren ondoren, aurreneko bi sailkatuekin berdinduta.
Hernaniko taldeek, ordea, bestelako emaitzak izan dituzte; batez ere, gorengo taldeei dagokienez. Hain zuzen, neska jubenilek galdu egin dute Ereintzaren aurka (20-27), eta sailkapeneko azken postuan dijoaz. Mutilak ere azkeneko postuan daude, Urolaren aurrean porrota jaso ondoren (34-25).
Gaztetxoen artean, denetik
Hernaniko gainontzeko taldeen artean, denetariko emaitzak izan dira. Kadeteetan, adibidez, garaipena, berdinketa eta porrota izan dira. Urnietaren kontra, neskek, galdu egin dute 31-11; mutiletan, Akola taldeak, berdindu, Ereintzaren kontra, 29ra; eta Sorlanek irabazi, Bera Berari, 28 eta 17.
Infantiletan, bestalde, neskek ezin izan dute Leizaranekin, eta 8 eta 18 galdu dute. Mutilen artean, Leokak irabazi egin dio Elgoibarri, 27 eta 25, eta azkenik, Goizargik galdu egin du La Salle Legazpiren aurka, 44 eta 17.